Foro bat sortzea proposatu du Markina-Xemeingo EH Bilduk, "egungo egoera kudeatzeko"
Osasun krisia herri mailan kudeatzeko foroa sortzea "ezinbestekoa eta funtsezkoa" dela deritzo koalizioak. Foro horretan diziplina anintzeko jendeak parte hartzea proposatu dute. Udalari proposamena luzatu diote.
COVID-19ak eragindako osasun krisia herri mailan kudeatzeko foro bat sortzea “funtsezkoa eta ezinbestekoa” dela dio Markina-Xemeingo EH Bilduk. “Argi dago gobernuek eta Labik hartutako neurriak bete egin behar direla, baina udalen eskumenekoak diren beste alor batzuk nola kudeatu herriko batzorde batean erabakitzea litzake onena”.
Foro horretan diziplina anitzeko jendeak parte hartzea proposatu du koalizioak; “hala nola, udaleko, osasun etxeko, ikastetxeetako, elkarteetako, ostalaritzako eta merkataritzako ordezkariekin osatu daiteke foroa”. Talde hori martxan jarriz gero, hainbat gairen inguruko erabakiak osasun neurriak eta herritarren premiak kontuan hartuta hartu ahalko liratekeela diote: “Adibidez, haurren parkeen itxiera edo irekiera, diru laguntzak banatzeko irizpideak, herriko tradiziozko ekintzen alternatibak…”.
Hain zuzen ere, azken puntu horrekin lotuta, udalak asteon jakinarazi du maiatzaren 9ra arte herrian egin behar ziren ospakizun guztiak bertan behera uztea erabaki dutela. “Horren aurrean, baina, ez da inolako alternatibarik proposatu. Batzorde bat edukitzeak kontu horiek guztiak ikuspegi global batetik lantzea ahalbidetuko luke”.
Gaineratu dute gaur gaurkoz Markina-Xemeinen ez dagoela horrelako batzorderik, eta, ondorioz, udalak bere kabuz hartzen dituela erabaki horiek. “EH Bilduk gonbitea luzatu dio udalari COVID-19ak sortutako egoera kudeatzeko herriko foro bat sortzeko pausoak eman ditzan”.
