Neguko agendaren bigarren zatiari ekingo diote Munitibarren
Doako bost ekitaldigaz osatu dute neguko agendaren bigarren zatia, eta aurretiaz izena ematea derrigorrezkoa da, aforoak mugatuta egongo direlako. Lehenengo ekintza otsailaren 12an egingo dute.
Lorea Zulaika Markina-Xemeinen emandako kontzertu batean. Azken asteetan pandemiaren eraginez kultura ekintzak atzeratu ondoren, neguko agendaren bigarren zatia aurkeztu du Munitibarko Udalak. Lehenengo ekitaldia datorren asteko barikuan egingo dute [otsailak 12]; umeentzako Kutxaka ikuskizuna eskainiko dute, 17:00etatik aurrera, Udal Aretoan. 5-10 urte bitarteko umeei zuzenduta dago, eta gehienez 30 pertsona sartu ahalko dira aretoan.
Ekintza guztiak doakoak dira, eta Munitibarko Udalak idatzitako protokoloan ageri diren baldintza eta segurtasun neurri guztiak errespetatuz egingo dituzte. Aforoa kontrolatzeko aldez aurretik izena eman beharko da. Hala ere, jarleku guztiak betetzen ez badira, egunean bertan aforoa bete arte sartzeko aukera egongo dela esan dute.
Astelehenetik barikura izena eman ahal da; 09:30etik 14:00era, udal administrazioan eta 16:00etatik 20:00etara, berriz, liburutegian.
Otsailaren 26an egingo dute hurrengo emanaldia. Serge bakarlari zarauztarrak kontzertua emango du Udal Aretoan, 19:00etan hasita. 28 pertsonako aforoa eduki dute, eta bertan egoteko otsailaren 15etik aurrera izena eman beharko da. Zarauztarrak Leihotik mundura disko berriaren aurkezpen kontzertua eskainiko du. Eraso! eta Osso taldeekin zortzi disko kaleratu ondoren, Sergio Ruiz G-Txabarri abeslari eta musikariak 2019an abiatu zuen bakarkako proiektua.
Doako ekitaldiak badira ere, aurretiaz izena ematea derrigorrezkoa da
Martxoaren 5erako, berriz, irakurleen arteko solasaldia prestatu dute. Martin eta Xabier Etxeberriaren Buyan: Heriotzaren uhartea liburua irakurri dutenen arteko solasaldia izango da, 19:00etan, liburutegian.
Martxoaren 12an musikaz beteko dute berriro ere Udal Aretoa. Lorea Zulaika Ziortza-Bolibarko bakarlariaren zuzenekoaz gozatuko dute bertaratzen diren herritarrek, 19:00etatik aurrera. 28 pertsonako aforo mugatua edukiko dutenez, kontzertura joan gura dutenek martxoaren 1etik aurrera izena eman beharko dute.
Neguko agendaren bigarren zati honetako azkenengo ekitaldia martxoaren 26an egingo dute. Orduan Miren Amuriza bertsolariaren eta Askoa Etxebarrieta La Pulga flamenko dantzariaren Gorria ikuskizuna ikusi ahalko da, 19:00etan, Udal Aretoan. Orduan ere 28 pertsonako aforoa egongo da, eta martxoaren 15etik aurrera izena eman beharko da udal administrazioan edo libutegian.
AGENDAREN EGUTEGIA:
- OTSAILAK 12. 5-10 urte bitartekoentzat Kutxaka ikuskizuna, 17:00etan, Udal aretoan.
- OTSAILAK 26. Serge bakarlariaren kontzertua, 19:00etan, Udal aretoan.
- MARTXOAK 5. Buyan: Heriotzaren uhartea liburuari buruzko irakurleen arteko solasaldia, 19:00etan, liburutegian.
- MARTXOAK 12. Lorea Zulaika Ziortza-Bolibarko bakarlariaren kontzertua, 19:00etan, Udal aretoan.
- MARTXOAK 26. Miren Amurizaren eta Askoa Etxebarrieta La Pulga-ren Gorria ikuskizuna, 19:00etan, Udal aretoan.
