Musika emanaldiak eskainiko ditu Tarine udal musika eskolak, Internetez
Osasun larrialdia dela-eta urtero egiten duten Neguko Entzunaldia ezin dutenez egin, horren ordez bideoan grabatutako ikasleen saioak eskainiko ditu Berriatuko eta Markina-Xemeingo musika eskolak.
Berriatuko eta Markina-Xemeingo Tarine Udal Musika Eskolak bideo bidezko musika emanaldiak eskainiko ditu, musika eskolaren webgunean. “Urtero egin izan dugun Neguko Entzunaldia ezin dugunez egin, horren ordez ikasleen emanaldiak grabatu egin ditugu, eta horiek webgunean ikusgai jarriko ditugu”. Zehatz esateko, eguaztenetik [otsailak 10] aurrera egongo dira bideoak ikusgai, Tarineren webgunean. Saio horien bidez, ikasleek orain arte ikasitakoa erakutsiko dute.
Ekimenari Burbuila Musikalak izenburua jarri diote, eta Markina-Xemeingo eta Berriatuko ikasleek parte hartuko dute. Guztira 50 bideo baino gehiago jarriko dituzte ikusgai. “Burbuia bakoitzaren barruan talde ezberdinak ariko dira. Adibidez, pianoa ikasten ari direnen bideoak ikusi ahalko dira, eta baita ere trikitia eta gitarra ikasten daudenenak ere”. Horiek, baina, adibide batzuk baino ez dira. “Bideo bakoitzean pieza bat eskainiko da. Pianoaren kasuan, bakarkako saioak izango dira, baina bikote batek lau eskutarako saioa ere eskainiko du. Beraz, pianoko ikasleen kasuan, burbuia txikiak ere eskainiko dira”. Esan dute kasu batzuetan bideo baten ikasle bat baino gehiagoren saioak eskainiko dituztela; “bideo bakarrean saio ezberdinak bata bestearen atzetik ikusi ahalko dira”.
Ikasle batzuek, gainera, burbuia ezberdinetan ere parte hartzen dutela esan dute. “Badaude ikasle batzuk musika tresna bat baino gehiago ikasten daudenak. Beraz, ikasle bat pianoa jotzen ikusi ahalko da, eta gero, ikasle bera, gitarra jotzen”.
Eguaztenetik [otsailak 10] aurrera, beraz, musika ikasten ari direnen saioez gozatzeko aukera eskainiko du Tarinek, eta herritarrei ere horiekin gozatzeko gonbitea egin diete. Gainera, bideo horiek edozein momentutan ikusi ahalko dira. Sare sozialen bidez ere webgunean dauden bideo batzuen zertzeladak eskainiko dituztela aurreratu dute.
Ez da estreinako aldia Tarinek horrelako zer edo zer egiten duena. Izan ere, azken hilabeteetan ere hainbat bideo zabaldu izan dituzte sare sozialetatik. Beraz, beste behin ere musika etxebizitza guztietara heldu ahalko da.
