Mijoako saneamendu proiektua idazteko lana lehiaketara atera dute
Mutriku eta Saturraran bitartean saneamendu sarearen lanak bi fasetan gauzatzea dago aurreikusi du URA agentziak. Proiektuak oinezkoentzako eta bizikletentzako bidegorri bat egitea ere jasoko luke.
URA agentziak Mutriku eta Saturraran bitartean saneamendu sarea hobetzeko asmoa agertu du. Esku hartze hori gauzatzeko proiektua idazteko lana lehiaketa atera dute. 50.000 euroko (60.500 euro, BEZ barne) aurrekontua du kontratuak. Enpresa irabazleak lau hilabeteko epea edukiko du proiektua idazteko.
URA agentziak azaldu duenez, jarduera bi fasetan gauzatzea dago aurreikusita. Lehen fasean, udalerriaren irteeraren eta Mijoa industrialdearen artean gauzatuko dituzte lanak. Bigarren fasean, berriz, industrialdea eta Saturrarango hondartzaren artean kokatutako eremuan egingo dituzte lanak.
Lehen faseari dagokionez, udalerriaren irteeraren eta Mijoa industrialdearen arteko saneamendu jarduerak osatuko dituzte. GI-638 errepidearen ondoan oinezkonetzako eta bizikletentzako bide bat diseinatzea ere aurreikusten da; bidegorriaren azpitik joango dira ur beltzen eta industria uren hodiak. Bidegorriaren diseinuari dagokionez, “2012an proiektatutako trazadurari eutsi zaio aldaketarik egin gabe”. Azaldu dutenez, bidegorriak 4 metroko zabalera edukiko du, eta erabilera banandua edukiko du oinezkoentzat eta bizikletentzat.
Bigarren fasean, berriz, industrialdearen eta Saturraran hondartzaren artean honako egiturak eraikitzea aurreikusten da: saneamenduko hodi biltzaile nagusia eta dagozkion adarrak, araztegiaren (Mijoa) irteeran kontserba industriaren hodi biltzailearekin lotzen duen adarra, saneamenduko bultzada hodia eta Saturrarango Ponpaketa Estazioa. Aldi berean, bidegorriari ere jarraipena emango liokete.
Aldarrikapen historikoa. Mutrikuko Udalak pozik jaso du albistea. Proiektua gauzatzea espero dutela azpimarratu dute. “Bere garaian proiektu bat bazegoen, eta orain lehiaketara atera dutena horren berridazketa da, moldaketa batzuk eginda. Udalaren aldetik urte askoan jarraitu izan den proiektu bat da, asko eskatu da. Bere garaian proiektu bat ere egin zen, baina horretan gelditu zen. Orain dirudienez, proiektua aurrera eramateko asmoa dago. Udaletik espero dena da proiektua gauzatzea, eta ez gelditzea proiektu soil batean”.
