Aitor Iturbe lekeitiarraren 'Kresaletik II' liburua eskuragarri dago euskarri digitalean
Joan den urteko abenduan kaleratu zuen Kresaletik bildumako bigarren lana historialari lekeitiarrak. Bigarren liburuki honetako berritasuna audioak dira.
Joan den urteko abenduan kaleratu zuen Aitor Iturbe Gabikagojeaskoa historialari lekeitiarrak Kresaletik bildumako bigarren liburua: Lekeitio, idatziak eta irudiak: 1884-1936, eta euskarri digitalean jarri dute eskura orain. Hala ere, Kresaletik II liburuaren aleren bat lortzeko aukera badago oraindik ere herriko liburu eta prentsa dendetan.
Aitor Iturbek idatzitako liburuan 1884 eta 1936 urteen artean Lekeitioren inguruan egindako idatzi eta irudiak biltzen dira. 300 orrialdetik gora ditu lanak, eta Lekeitioko hainbat kontu interesgarri jaso ditu Iturbek orrialde horietan guztietan. Liburuari argazkiekin ematen dio hasiera; irakurleak hainbat argazki aurkituko ditu bigarren atal honetan. Izan ere, argazkien aurreko Lekeitio ekarri zuen gogora idazleak lehen atalean, eta bigarren atal honetan argazkiak dira nagusi. Lekeitioko ondare eta gertaerei buruzko idatziak osatzen dute atal berria. Besteak beste, El noticiero Bilbaino, La Epoca eta beste egunkari batzuk Lekeitiori buruz 1884 eta 1936ko tarte horretan argitaratutako albisteak edota argazkiak eta horiei lotutako pasarteak jaso ditu Iturbek, orduko kontuak eta pertsonaiak gaur eguneraino ekarriz.
Lekeitioko historia hurretik eta modu arin baten ezagutzeko aukera eskaintzen du liburuak, umore dosi apur bategaz. Oraingoan ere, Markuesen txisteak gaineratu ditu kontakizun batzuetan. Bigarren liburuki honetako berritasuna audioak dira, Lekeitioko kanta batzuk gehitu ditu Iturbek: Anteron Txamarrotia, Aeroplano bi pasata edota Lekeitioko Sanpedropeko beste batzuen artean.
