Ikusgarrik ateak zabalduko ditu berriro, ia hilabete itxita egon eta gero
Lekeitio gune gorritik atera dela eta, Zinemazaleen elkarteak berriro ere proiekzioak antolatzeari ekin dio. Zapatuan, domekan eta astelehenean eskainiko dituzte proiekzioak.
Lekeitioko Ikusgarri zinema aretoko pantaila istorioak kontatzen hasiko da berriro ere. Izan ere, Lekeitio gune gorrian sartu zenetik (urtarrilak 14) zinema aretoa itxita egon da. Orain, baina, herriko intzidentzia tasa jaitsi egin da eta Lekeitio gune gorritik atera da. Beraz, Ikusgarrik ere ohiko programazioari berrekin dio.
Zapatuan, domekan eta astelehenean (otsailak 13-14-15) eskainiko dituzte proiekzioak. Gazteentzako eta nagusientzako saioak eskainiko dituzte:
- Gazteentzako saioak zapatuan eta domekan (otsailak 13-14) eskainiko dituzte, 16:30ean. Asteon, esaterako, Los croods, una nueva era filma proiektatuko dute.
- Nagusientzako saioak zapatuan, domekan eta astelehenean (otsailak 13-14-15) izango dira, 19:00etan. Hiru egun horietan El padre filma ikusteko aukera egongo da.
Zinemazaleen ekintzailetza. 2013ko abuztuan Lekeition geratzen zen zinema areto bakarra itxi egin behar zutela zabaldu zenean herrian, jende asko kezkatzen hasi zen. Zinemaz giro egokian gozatzeraren alde zeuden herritarrak, baina, egoerari buelta emateko mugitzen hasi ziren, modu espontaneoan. Ideiak eta proposamenak jaso eta konponbidea bilatzeko bideari ekin zioten. Eta bide horretan profil ezberdineko jendeak bat egin zuen: nagusiak, gazteak, emakumeak zein gizonak, ingurukoak, herritar petoak edo aldizkako lekeitiarrak. Bezeroak bazkide bihurtzeko proposamena mahai gainean jarrita, Zinemazaleen elkartea sortu zuten; gaur egun 500 bazkidetik gora dira elkartean.
Filmen proiekzioak eskaintzen hasi, eta kontzertuak, antzerki emanaldiak eta bestelako kultur eskaintzari ere lekua egin diote gerora. Zinema areto bat izatetik hizki handiekin idatzi daitekeen kultur areto izatera pasatu da Ikusgarri.
