Jaurlaritzak babestu egingo du Lea Ibarran hondakinak pisatzeko sistema hobetzeko proiektua
Eusko Jaurlaritzak garapen jasangarrirako tokiko 163 proiektu babestuko ditu 3,3 milioi eurorekin, tartean Lea Ibarrako Udal Mankomunazgoarena.
Eusko Jaurlaritzaren Ekonomiaren Garapen, Jasangarritasun eta Ingurumen Sailak 2022ra arte garapen jasangarrirako ekintzak aurrera eramateko udalen eta tokiko erakundeen 163 proiekturi laguntzeko konpromisoa hartu du, eta nabarmendu dituzten hamasei proiektuen artean dago Lea Ibarrako Udal Mankomunazgoarena.
Lea Ibarraren mankomunitatean hondakinak pisatzeko sistema egokitzen jarraitzeko proiektua dauka, hondakinak biltzeko zerbitzuan 2019an gauzatu zuten egokitzapenaren jarraipen gisa. Bizkaian aitzindariak izan ziren edukiontzien uharte osoak instalatzen eta sarrailak eta identifikazioa jartzen errefusaren eta hondakin organikoen edukiontzietan. Proiektuak aurreikusten du kamioietan pisatze sistema bat ezartzea, uharte guztien jarraipena egiteko eta hobetzeko ekintzak egin ahal izateko puntu gatazkatsuetan.
“Klima ekintzaren ildoari jarraituz, diruz lagundutako proiektuekin 7.900 tona CO2 murriztea lortuko da”
115 erakunde onuradun. Proiektu horiek udalek, mankomunitateek, tokiko garapen-agentziek eta beste toki-erakunde batzuek garatuko dituzte. Horietatik 67 Gipuzkoan egingo dira, 64 Bizkaian, eta 32 Araban. Guztira, 115 erakunde izango dira onuradunak, eta horietatik 17k lehen aldiz parte hartzen dute programa honen barruan dirulaguntza eskatuz. 3,3 milioi euro bideratuko dituzte 163 proiektu horiek babestera. Zehaztu dute laguntzen “guztizko kopurua apur bat handitu” dutela aurreko urtearen aldean.
Proiektuok lehentasuneko bost jardun-eremutan gauzatuko direla esan dute: klima-ekintza, ekonomia zirkularra, lurzoru kutsatuak, natura-ondarea eta jasangarritasunaren aldeko hezkuntza. “Klima ekintzaren ildoari jarraituz, diruz lagundutako proiektuekin 7.900 tona CO2 murriztea lortuko da, eta 22.300 tona CO2 atzematea, 39 lur-hektarea baino gehiago landatzeari eta basoberritzeari esker”.
Besteak beste, 19 udalerrik klima aldaketa arintzeko eta klima aldaketari egokitzeko planak egingo dituzte, eta neurriak abian jarriko dituzte, lurraldearen erresilientzia handituz klimaren inpaktu negatiboei aurre egiteko. Aurten, gainera, karbono-hustubideei lotutako beste lerro bat garatu da, karbono bidezko neutraltasun-helburu markatuak lortzeko ezinbestekoa dena.
Ekonomia zirkularraren proiektuen bidez, gaikako bilketa handitu eta errefus-hondakinen sorrera murriztu nahi dute: aurreikusten dute urtean 7.260 tona errefus-hondakin gutxiago biltzea eta 5.790 tona artekoa izatea biohondakinen gaikako bilketa hondakin organikoei dagokienez.
