Markina-Xemeingo intzidentzia tasa 500 azpitik kokatu da
Azken orduetan 100 puntu jaitsi da Markina-Xemeingo intzidentzia tasa. Bestalde, azken orduetan 14 kasu gehiago erregistratu dituzte: 7 Lekeition, 5 Ondarroan eta 2 Mutrikun. Ondarroaren eta Mutrikuren intzidentzia tasak zer edo zer igo dira, baina gune laranjan eta horian egoten jarraitzen dute, hurrenez hurren.
Azken 24 ordutan COVID-19arekin kutsatutako 14 kasu erregistratu dituzte Lea-Artibai eta Mutrikun: 7 Lekeition, 5 Ondarroan eta 2 Mutrikun. Azken bi herri horietan, gainera, intzidentzia tasa zer edo zer igo da; Ondarroak gune laranjan egoten jarraitzen du, eta Mutrikuk horian. Azpimarragarria da Markina-Xemeingo intzidentzia tasa 500 azpitik kokatu dela gaur [otsailak 9].
Nahiz eta Markina-Xemeinek gune gorritik kanpo egoteko datuak eduki, Jaurlaritzak gune gorrian dauden herrientzako ezarritako neurri murriztaileak indarrean egongo dira oraindik, gutxienez barikura [otsailak 12] bitartean; Jaurlaritzak eguenean (otsailak 11) eguneratuko du gune gorrian dauden herrien zerrenda, eta datuak mantenduko balira, Markina-Xemein gune horretatik aterako litzateke hurrengo egunean (otsailak 12).
Lekeitio atzo atera zen gune gorritik, eta gaurtik aurrera hango ostalaritza establezimenduak zabalik daude, eta eskola kiroleko ekintzak antolatu ahal dituzte. Lekeitio ia hilabete egon da gune gorrian, eta Markina-Xemeinek ere beste horrenbeste darama gune gorrian; bi herriak urtarrilaren 14an sartu ziren gune gorrian.
Gaur gaurkoz, ondokoa da herriz herriko intzidentzia tasa:
- Amoroto: 722,89
- Aulesti: 149,70
- Berriatua: 477,33
- Etxebarria: 671,14
- Gizaburuaga: 0
- Ispaster: 134,41
- Lekeitio: 401,27
- Markina-Xemein: 437,81 (gune gorrian egongo da eguenera bitartean)
- Mendexa: 847,46
- Munitibar: 218,34
- Mutriku: 225,82
- Ondarroa: 385,20
- Ziortza-Bolibar: 455,58
Joan den aste osoan (otsailak 1etik 7ra) 45 kasu erregistratu zituzten Lea-Artibai eta Mutrikun. Duela bi aste (urtarrilaren 25etik 31ra), baina, 74 kasu erregistratu zituzten, joan den astean baino 29 gehiago.
Joan den astean herriz herri erregistratutako kasuak:
- Lekeitio: 14
- Ondarroa: 14
- Mutriku: 4
- Etxebarria: 4
- Amoroto: 3
- Berriatua: 2
- Markina-Xemein: 2
- Mendexa: 1
- Munitibar: 1
- Aulesti: 0
- Gizaburuaga: 0
- Ispaster: 0
- Ziortza-Bolibar: 0
