Elkarretaratze zaratatsua deitu dute Ondarroan, apustu etxeak zabalik daudela salatzeko
Jaurlaritzak hartutako erabakiaren aurka protesta egingo dute zapatuan. 12:00etan Augustin Zubikarai enparantzan batzeko deia egin dute.
Aurretik ezarritako neurri murriztaileak malgutu eta apustu etxeak zabaltzeko baimena eman du Eusko Jaurlaritzak. Lakuako gobernuak hartutako azken erabakiagaz ez datoz bat Ondarroako Apustu etxeen aurkako plataformako kideak. Hori dela eta, kalera ateratzeko deia egin dute.
Zapatuan [otsailak 13] elkarretaratze zaratatsua egingo dute herriko apustu etxearen aurrean. 12:00etan Augustin Zubikarai enparantzan batzeko hitzordua ipini dute, eta bertan parte hartzeko deia egin diete herritarrei. “Plataformako kideok txistuak eramango ditugu eta bertaratzen direnen artean banatuko ditugu. Nahi duenak zarata ateratzeko lapikoak edo antzerako beste edozer ekartzen badu ere, ongietorria izango da”.
Jaurlaritzak hartutako erabakiaren atzean interes ekonomikoak ezkutatzen direla salatu dute. “Jaurlaritzak hainbat neurri murriztaile ezarri dituen bitartean, eta COVID-19an ondorioz sortutako pandemia nahiz eta unerik gogorretariko batean egon, apustu etxeak berriro ere irekitzea erabaki du. Argi geratu da, urtez urte 2,3 billoi euro mugitzen duen negozio bati trabak ipintzea ez dela errentagarria. Betiko moduan, interes ekonomikoa jendearen ongizate eta osasunaren aurretik ipini dituzte”.
