Markina-Xemeingo Uhagon osteko bolatokia itxi dute haizeak eragindako kalteengatik
Denbora gutxian bigarrenez apurtu da bolatoki horretako estalpea. Urtarrilean ere, haizeak plastikozko estaldura zulatu zuen.
Uhagon atzeko bolatokia apurtuta. Orain dela asteburu bi izandako haize denboraleak Uhagon kulturgunearen atzean dagoen bolatokiaren estalpea apurtu eta egurrezko egituran ere kalte handiak eragin zituen, eta arriskuak saihesteko itxi egin behar izan dute.
Denbora gutxian bigarrenez apurtu da bolatoki horretako estalpea. Urtarrilean ere, haizeak plastikozko estaldura zulatu zuen, eta urtarrilaren 20an ibili ziren Markina-Xemeingo Hiru Txirlo (MX3T) elkartekoak konponketak egiten. Hobeto eutsiko zuelakoan, plastiko sendoagoa jarri zutela azaldu du Mikel Urkia Zuloaga MX3T elkarteko kideak. Baina, itxura denez, zurrunbiloa sortu zen azpian, eta konponketak egin eta 12 egunera, plastikoko estalpea arrakalatzeagaz gainera egurrak ere apurtu zituen haizeak. Bolatokiaren egoera ikusita, Markina-Xemeingo Udalari eman zioten horren berri. «Orain arte gu ibili gara konpontzen, baina gastu ekonomikoagaz gain, buruhauste handia eragiten digu egoera honek; haize apur bat egiten duenean zer edo zer gertatuko ote den adi egon behar izaten gara, eta neketsua egiten ari zaigu», azaldu du Urkiak.
Aurten bost urte. Markina-Xemeingo herrigunean ere bola jokorako aukera eskaini eta bola jokoaren zaletasuna biziberritu asmoz prestatu zuten MX3T elkartekoek Uhagon kulturgunearen atzeko partean dagoen bolatokia 2018ko ekainaren 17an. Ordutik hainbat txapelketa egin dira bertan bai nagusi zein gazteenak (Karmen Egunekoa, Bizkaikoa…), eta entrenatzeko gune ere izan da bolarientzat.
Urte hauetan MX3T elkartekoak arduratu dira egitura zaintzeagaz, eta estalpeagaz ez dute zorte gehiegirik eduki. 2018ko jaietarako toldo urdina jarri zioten, eta hurrengo urteko San Fermin egunean dena kendu eta jarri zuten berria. Hasieratik, baina, apurtzen joan da aldiro-aldiro. «Zuhaitzen adarrak jausten dira eta estalpea zulatzen dute». Arrazoi bat edo beste, guztira, zazpi bider apurtu da estalpea.
Elkartekoek jakitera eman dutenez, plastikozko estalpea barik, aterpe egokiago bat egiteko eskaera egin dute udalean, aurrekontu bat eskatu dute eta prest agertu dira auzolanean egiteko. «Birritan eskatu dugu, bai aurreko udal gobernuari eta gaur egungo udal gobernuari, baina, biek erantzun bera eman digute. Esan digutenez URAk ez du baimenik ematen errekatik hurre ezin da-eta ezer eraiki».
Ilusio handiagaz zeuden MX3T elkartekoak. 2019an elkartea sortu eta indar handiagaz hasi zuten 2020 urtea, baina COVID-19aren ondorioz bertan behera geratu zitzaizkien asmo guztiak. Orain, berriz, herriguneko bolatoki barik geratu dira. «Pena handia ematen digu bolatokiaren egoerak. Gainera, aterperik barik egoterakoan pista ere apurtuko dela ikusten dugu».
