Urrirako amaituko dute Mutriku eta Deba lotuko dituen pasealekua
Lanak datozen egunotan aterako dituzte lehiaketara. 491.104 euroko aurrekontua du kontratuak eta bost hilabeteko exekuzio epea. Estuarioaren ibilbidea jarraituko duen pasealekuak Ondarbeltz eta Urazamendik kaleko 10. atariaren aurrea batuko ditu.
Ruben Andonegi Mutrikuko Hirigintza zinegotzia, Aintzane Oiarbide Bide Azpiegituretako diputatua, Gilen Garcia Debako alkatea eta Ion Ganbra Mutrikuko zinegotzia eta Giza Eskubideen eta Kultura Demokratikoaren foru zuzendaria, gaur goizean, proiektua aurkezten Gipuzkoako Foru Aldundiak Ondarbetz hondartzaren eta Mutriku eta Deba batzen dituen zubiaren artean pasealeku bat egitea onartu du aste honetako Diputatuen Kontseiluan. “Proiektua eta pleguak martitzenean [otsailak 9] onartu ziren”. Modu horretara, Mutriku eta Deba oinez lotuko dituen pasealekuari amaiera emango diote.
Aintzane Oiarbide Bide Azpiegituretako diputatuak gaur [otsailak 10] eman ditu proiektuari buruzko xehetasunak. Mutrikuko eta Debako udal ordezkariekin batera egin duen agerraldian esan duenez, okerrik ezean, pasealekuaren azken zatiko lanak urrirako amaitzea aurreikusten dute. Esku hartze hori gauzatzeko lanok datozen egunotan aterako dituzte lehiaketara; 491.104 euroko aurrekontua du kontratuak eta bost hilabeteko exekuzio epea.
Gorriz markatuta dagoen zatian egingo dute ibilbidea. Iturria: Gipuzkoako Foru Aldundia.
Obra bere osotasunean aurretik zergatik egin ez zuten ere azaldu du diputatuak. Mutriku eta Deba batzen dituen GI-638 errepidea hobetzeko lanak egin zituztenean, obra hori pasealekua egiteko ere baliatu zutela esan du, baina Urazamendiko ibilbidea proiektu horretatik kanpo geratu behar izan zela. “Proiektutik kanpo geratu zen. Batetik, kolektore berria sartzeko proiektua egin behar zelako eta, bestetik, Debegesak egin beharreko planeamenduak ez duelako aurrera egin”.
Azpimarratu duenez, bertatik ibiltzen diren oinezkoen “arrisku handiko egoerak” saihesteko eraikiko dute pasealekuaren azken zatia. 2020ko martxoaren amaieran ireki zuten Mutriku Ondarbeltzekin batzen duen pasealekua, baina orduz geroztik Urazamenditik datozenek errepidearen bazterretik ibili behar izan dute nahitaez. “Horrek istripuak izateko arrisku handiko egoerak sortzen ditu. Egoera honi irtenbide emateko, Bide Azpiegitura departamenduak saneamenduko kolektorea eraikitzeko proiektua idatzi duenean kolektore gainetik Ondarbeltzetik pasealekua egiteko aukera ikusi du, Debegesako planeamenduari itxaron gabe”.
Urazamendik kaleko dorre altuaren aurrean ipiniko dute egingo dute oinezkoen igarobidea
460 metro edukiko ditu pasealekuak, eta Ondarbeltzeko aparkalekua eta Urazamendik kaleko 10. atariaren aurrea batuko ditu. Zehaztu duenez, estuarioaren ibilbidea jarraituko du. “Harri-lubeta bat eraikiko da. Saneamenduko hodia bertan joango da eta, gainean, oinezkoen pasealekua”. Pasealekua osatzeko, gainera, Mutriku eta Deba batzen dituen zubitik Urazamendik kalearen 10 zenbaki parera arte dagoen 375 metroko espaloi zatia ere aprobetxatuko dute. Lehendik eraikita dagoen espaloi zatia eta ibilbide berria semaforodun igarobide batekin batuko dituzte.
