Aulestiarrek udaletxean eskatu dezakete BakQ identifikazio elektronikoa
16 urtetik gorakoek eskatu dezakete, beti ere, helbide elektronikoa eta telefono mugikorra badauzkate.
Beste hainbat udaletan modura, aurreko astetik BakQ herritarrentzako identifikazio elektronikoa eskatu daiteke Aulestiko udaletxean.
Idazkaritzan, liburutegian edo ziurtagiri digitalagaz Internet bidez egin ahal da eskaria (NANa eroan behar da identifikatzeko). 16 urtetik gorakoek eskatu dezakete, beti ere, helbide elektronikoa eta telefono mugikorra badauzkate.
BakQ pertsona fisikoak identifikatzeko bitartekoa da, “ziurtagiri erraz eta erabilgarria”. Elektronikoki sinatzeko, baimentzeko eta telematikoki autonomia erkidegoko administrazio publikoekin harremanetan jartzeko eta zenbait tramite egiteko aukera eskaintzen du. Aulestiko Udalagaz egin daitezkeen tramiteak zeintzuk diren zehaztuta dago udalaren webgunean. Tramiteak online deritzon atalean jasota daude horiek zeintzuk diren. “Beste administrazioekin egin daitezkeenak organismo bakoitzaren webgunean kontsultatu daitezke”.
Erabiltzailea, pasahitza eta SMS bidez telefono mugikorrera bidaltzen duten kode batez osatuta dago, eta edozein gailu elektronikotik erabili daiteke, software-ik instalatu beharrik barik.
