Errautsak gordetzeko kolunbarioa prestatzen ari da Lekeitioko Udala
Ordenantza onartutakoan, udalerrian erroldatuta dauden, jaio diren edo udalerriagaz lotura daukaten pertsonen errautsak utzi ahalko dira bertan.
Lekeitioko hilerreian prestatzen ari diren kolunbarioa. Argazkia: Lekeitioko Udala Laster egongo da prest Lekeitoko hilerriko kolunbarioa, eta bere erabilera eta okupazioa arautzeko ordenantza bat aterako du Lekeitioko Udalak. Baina, ordenantzaren prozedura martxan jarri aurretik, herritarren artean galdeketa bat egingo dutela jakitera eman du udalak.
Ordenantzaren zirriborroa udaleko bulego orokorretan eta udalaren webgunean daukate eskura interesdunek, eta ekarpenak bulego orokorrean bertan edo udalaren helbide elektronikora idatzita (udala@lekeitio.eus) egin ahalko dituzte. Ekarpenak martxoaren 3ra arte egin ahalko dira.
Ordenantza onartutakoan, udalerrian erroldatuta dauden, jaio diren edo udalerriagaz lotura daukaten pertsonen errautsak utzi ahalko dira bertan, udaletxean eskaera egin eta aldeko ebazpena jaso ondoren. Udalak argitu duenez, hilerrian senitartekoak ehortzita dituztenek ere, baldin eta lehen graduko ahaideak badira (aita, ama eta seme-alabak), gorpua hobitik ateratzen denean errauts kutxatila utzi ahal izango dute bertan, aurretik eskaria eginda.
Kolunbarioa 10 urtez erabili ahal izango da, baimenaren jakinarazpena egiten denetik zenbatzen hasita. Emakida epea behin bakarrik luzatu ahalko da, beste hamar urtez, eta horretarako eskaria epe hori amaitu baino hilabete aurretik egin beharko da gutxienez.
Udalak azaldu duenez, eskari bakoitzeko gehienez ere hiru errauts kutxatila gorde ahalko dira Kolunbarioan.
