Euskara Bizkaian hitz egiten diren beste hizkuntzen aterpe eta zubi dela dio aldundiak
Bizkaian 120 hizkuntza baino gehiago hitz egiten direla adierazi du aldundiak bultzatuta egindako azterketak. Euskara eta gazteleraz gain lau dira jatorri hizkuntza nagusiak Bizkaian: Galegoa, arabiera, tamazight eta errumaniarra.
Ezkerretik eskumara, Xabier Arauzo, Lorea Bilbao, Xabier Aierdi eta Belen Uranga. Argazkia: Bizkaiko Foru Aldundia. Bizkaian dauden hizkuntzen inguruko azken ikerketa aurkeztu du Bizkaiko Foru Aldundiak. Zehaztu dute ikerketa burutu dutela euskara, gaztelania eta ingelesa ez diren Bizkaiko Hizkuntza-aniztasunaren ezagutza edukitzeko. Bizkaian ditugun hizkuntza guztiak ditugu aberasgarri, eta nahiko genuke gainera guzti horiek euskara ere etxeko sentitzea, edota zubigile ikustea, euskarara hurbiltzeko gogoa eta ilusioa edukitzea, eta beraien hizkuntzekin batera euskara bera ere beraientzat hartzea”, azaldu du Lorea Bilbao Ibarra Euskara, Kultura eta Kirol diputatuak.
Bilbaok adierazi zuenez, ondorio argia atera da Bizkaiko Hizkuntzen mapa eginda: lurraldeko gizartea ama hizkuntzetan oso aberatsa dela, anitza. “120 hizkuntza baino gehiago hitz egiten dira”.
Azpimarratu dute euskaratik eta euskaraz hizkuntza guztien balioa aitortzea dela euren helburua. “Euskara eta gazteleraz gain badira Bizkaian hiru hizkuntza 10.000 hiztun baino gehiago dituztenak (Galegoa, arabiera, tamazight…) eta 1.400 hiztun baino gehiago dituzten beste zazpi hizkuntza. Bizkaian presente dauden herritar guzti horien hizkuntzak ez ditugu ezkutatu nahi, hizkuntza horien berri eman nahi dogu, eta hizkuntza horiek erabiltzen dituzten herritarrak animatu bakoitzak bereari eustera”. Eta esan dute ez dutela nahi euskararen etorkizuna gainontzekoak baztertuta edo ukatuta eraiki nahi. “Sendo nahi dugu euskara, baina guztienganako errespetuan eta guztiengandiko errespetuan, euskararen lurraldeetan, guztion aterpe bezala eta guztion arteko zubiak eraikiz, inorena ezkutatu barik, elkarrenganako errespetuan eraikitako aniztasunean”.
2019. urtean Bizkaian 115.686 biztanle ziren jatorria atzerritarra zutenak, biztanleriaren %10. Horietatik 93.878 biztanle (%81,1) dira hogei estatu nagusitatik etorritakoak. Horien artean, gaztelania jatorri hizkuntza ofiziala duten hamar estatu dira: Kolonbia, Bolivia, Paraguai, Nikaragua, Venezuela, Ekuador, Peru, Argentina, Honduras eta Kuba; orotara, 50.230 biztanle.
Marokotik eta Aljeriatik etorritako biztanleak kontuan hartuz, arabierak ere presentzia esanguratsua dauka Bizkaian; arabiera eta Tamazight jatorri hizkuntza gisa daukate 13.435 biztanlek.
Jatorria Portugalen edo Brasilen duten biztanleak, ostera, 5.793 dira eta portugesa dute jatorri hizkuntza gisa.
Halaber, ondorengo jatorri hizkuntzetako bat daukaten biztanleen kopurua altua da Bizkaian: errumaniera (11.119), mandarin txinera edota kantonera (4.159), frantsesa (2.529), baita Senegalen jatorria duten Wolof, fula edota serer hizkuntza (hiru horien artean 3.259); bestalde, Nigeriatik etorritakoak Jorubera, igboera eta hausa hizkuntzak dituzte, guztira 1.877 hiztun eta Pakistanetik etorritakoen hizkuntzak (Urdu eta Punjabera) 1.477 biztanlek hitz egiten dituzte. “Ez dira ahaztu behar jatorri lurraldeetako hizkuntza ofizialak ez direnak, horiek presentzia txikia daukaten arren”.
