Munduko Kopa lehiatzetik Munduko Txapelketa lehiatzera pasatuko da Quincoces
Nahia Quincoces Mendexako mendi eskiatzaileak Munduko Koparen 4. proba lehiatu du astebutuan Italian, eta datorren astean Munduko Txapelketen lasterketak lehiatuko ditu Andorran.
Argazkia: Jesus Dymages. Munduko Koparen 4. jardunaldian parte hartu du Nahia Quincocesek asteburuan. La Marmota Trophy proba lehiatu du Val Di Martellen, Italian. Zapatuko esprint lasterketa 24. amaiatu zuen, eta domekako banakako lasterketan 25. sailkatu zen.
Bi egunotan asko gozatu du. Sentsazio onekin, gustura aritu da, eta ibilbidea zoragarria izan dela azpimarratu du mendexarrak: “Fisikoki ez nago beste urteetako moduko sasoian, baina lasterketa hau batez ere lekuagatik eta ibilbideagatik berezia izan da. Estazio gabeko leku batean egin dugu, leku oso polita. Ibilbide zoragarria izan zen, egun ona eta elur ona izan ditugu. Nahiz eta ez egon aurrekoekin lehiatzen, pila bat gozatu nuen”.
Beste proba batzuetakoekin konparatuta, esprinta arina eta laburra izan zela azaldu du. Lehenengo txanda egin, eta final-laurdenetara sailkatu zen, eta bertan, eskiak motxilan ipintzeko momentuan apur bat trabatu zen, eta denbora galdu zuen: “Hor galdu nituen aukerak finalaurrekoetara sailkatzeko”.
Banakakoaren hasiera “oso polita” izan zela dio: “Baso batetik hasi ginen. Atzean hasi nintzen, eta pixka bat inbutua sortu zen. Ahal zen ondoen postua hartzen ibili ginen, atzean ez geratzeko”. Nahiz eta atzean hasi, postuak aurreratzeko asmoz aritu zen, baina ezin izan zuen bere helburua bete.
Martxoaren azken asteburuan Italian lehiatuko dute Munduko Koparen azkenengo jardunaldia, eta oraindik ez daki bertan egongo den.
Italiatik Andorrara. Munduko Koparen asteburuko probaren ostean, Andorrara begira daude mendi eskiatzaileak; datorren astean Munduko Txapelketak lehiatuko dituzte bertan.
Quincoces, printzipioz, errelebokako lasterketan ariko da eguaztenean [martxoak 3] eta banakakoan zapatuan [martxoak 6]. Errelebokako lasterketarako “ilusio berezia” dauka: “Ana eta Marta indartsu daude. Lasterketa mota hau gutxitan egiten dugu, eta ilusio berezia egiten dit parte hartzeak. Bi horiek egingo ditut eta ez dakit besterik egingo dudan, oraindik ez dago argi”.
Denboraldi hasieratik begiz jota daukan hitzordua da Andorrakoa, eta ilusioz dago. Ibilbideak itxura ona daukala zehaztu du: “Elurraren arabera izango da, eta oraindik ziur ez dakigu, baina hasiera batean ipini duten ibilbideak itxura oso ona dauka, eta ibilbide hori egitea lortzen badute, oso polita izango da. Ea lortzen den. Oraindik egunak falta dira, eta eguraldiak aginduko du”.
Bestalde, martxoko bigarren asteburuan, Frantzian distantzia luzeko bikotekako lasterketa lehiatuko du: “Pentsatzen dut joango naizela. Bigarren talde moduan joango naiz, oraindik ez dakit zein izango den nire bikotea, baina uste dut Fatima izango dela”.
