Oihana Kortazarrek bere lehen elur gaineko lasterketa irabazi du
Nahiz eta diziplina horretako lehen lehia izan, erraz nagusitu da Mutrikun bizi den korrikalari elgetarra. Elur gaineko lasterketekin jarraitzeko asmoa dauka.
Oihana Kortazar (erdian), Rebeca Mariño eta Nuria Dominguez bigarren eta hirugarren sailkatuekin. Argazkia: Felix Corchado Mendiko lasterketa gehienak bertan behera geratu direla-eta elur gaineko lasterketak egitera animatu da Mutrikun bizi den Oihana Kortazar korrikalari elgetarra. Zapatuan [otsailak 20] La Covatilla (Bejar, Salamanca) eski estazioan lehiatu zen elur gaineko lasterketan parte hartu zuen, eta nahiz eta diziplina horretako bere lehen lehia izan, erraz gailendu zen. Ordubete eta 36 minutuko denborarekin amaitu zuen Kortazarrek proba. Hasieratik jarri zen lasterketaren buruan eta hala amaitu zuen. Rebeca Mariñok lortu zuen zilarra eta Nuria Dominguezek brontzea.
Sei kilometroko zirkuituari bi itzuli eman behar izan zizkioten korrikalariek, guztia elur gainean eta 600 metroko desnibel positiboarekin, eta diziplina berria zuen arren, ondo moldatu zen Kortazar. Jakitera eman duenez, elurretan kranpoiekin oinez ibiltzera ohituta dago, baina ez korrika egitera: “Ibili izan naiz kranpoiekin oinez, baina ez korrika. Hala ere, distantzia nahiko motza zenez, 12 kilometro, egiteko moduan eta entrenamendu bezala hartzeko moduan behintzat banengoela pentsatu nuen. Era horretara joan nintzen, planteamendu horrekin, eta nahiz eta jakin ez zela nik kontrolatzen nuen diziplina bat, nire korrika egiteko moduan ohikoa den bezala, nire erritmora atera nintzen, eta ondo joan zen”.
Kortazar: “Ez zen izan lasterketa luzeetan eguraldi txarra egiten duenean bezala, kilometroak eta kilometroak egoten zarela goiko partean denboralearen menpean. Minutu gutxi batzuk izan ziren, baina hotz handia egin zuen”
Eguraldia, ordea, ez zuten lagun izan, eta goiko partean haizeak gogor jotzen zuela zehaztu du korrikalariak. “Elur-bisutsak elur izoztua altxatzen zuen eta hanketan jotzen zintuen baten bat harriak jaurtitzen egongo balitz bezala. Hala ere, goiko partetik azkar igarotzen ginen. Mendiaren goiko partera heldu, tontorra zeharkatu eta behera berriro. Ez zen izan lasterketa luzeetan eguraldi txarra egiten duenean bezala, kilometroak eta kilometroak egoten zarela goiko partean denboralearen menpean. Minutu gutxi batzuk izan ziren, baina hotz handia egin zuen”.
Hala ere, esperientzia berria gustuko izan du korrikalariak, eta errepikatzeko asmoz dago. Horrela, hemendik hamabost egunera Sorian lehiatuko den beste elur gaineko lasterketa batean parte hartzeko asmoa dauka.
