Sarai Larrinaga etxebarritarrak brontzezko domina irabazi du Espainiako txapelketan
Zapatuan [otsailak 20] Castellon (Valentzia) lehiatu den 18 urtez azpiko txapelketako disko jaurtiketa proban parte hartu du. Bere marka hobetzea lortu du Durango Kirol Taldeko atleta gazteak.
Sarai Larrinaga Lejardi. Argazkia: Durango Kirol Taldea Sarai Larrinaga Lejardi atleta bikain aritu da asteburuan Castellon (Valentzia) jokatu den 18 urtez azpiko Espainiako txapelketan. Etxebarriko atletak brontzea lortu zuen disko jaurtiketan 37,64 metroko marka eginda.
Emaitzagaz “pozik” agertu da Durango Kirol Taldeko atleta. Azaldu duenez, zapatuan [otsailak 20] 17:00etan jokatu zen proba, eta 15: 30 ingururako zegoen pistan “beroketak egin, pista ikusi eta lasaitzeko”. Lehenengo jaurtiketan lortu zuen podioaren 3. mailara igotzeko aukera eman dion marka egitea. “Itxaropen asko nituen, azken baten, nire buruarengan sinistu behar nuen bakarrik, egin ahal nuela pentsatu eta konfiantza eduki”. Lehenengo jaurtiketa eginda, oraindik beste jaurtiketa hobeago bat egiteko asmoa zeukan, baina urduritasunak gehiago egin ziola aitortu du. Izan ere, bigarren aldia izan da Espainiako txapelketan diskoagaz parte hartzen duena; pisuagaz gehiagotan parte hartu du.
Euskadiko absolutu txapelketan bere marka metro batean hobetu zuen Larrinagak, eta marka hori hobetu egin du oraindik Castellon. Bere markarik onena egitea lortu du; aurreko marka 36,75 zen. Esan duenez, denbora gutxi darama diskoan lehiatzen, Iruñean jokatu zuen Euskadiko txapelketa eta Durangon hurrengo, baina neguko denboraldi bikain bat egitea lortu du; brontzezko domina bi jantzi ditu atleta gazteak, Euskadikoa eta Espainiakoa.
Castelloko probagaz, Larrinagak amaitu du neguko disko denboraldia, eta entsegatzen jarraituko du ekainean hasiko duten udako denboraldirako prest egoteko. Pisuagaz jarraituko du ordea lehian. Aurreratu duenez, zapatuan [otsailak 27] Euskadiko txapelketa lehiatuko du, eta datorren hilean Espainiako txapelketa edukiko du Bartzelonan.
