Urrezko Harrijasotzaile Txapelketaren finalean ariko da Inhar Urruzuno
Ondarrutarrak Beñat Telleriaren eta hirugarren finalaurreko irabazlearen aurka neurtu beharko ditu indarrak finalean. Norgehiagoka martxoaren 14an jokatuko dute Azpeitian.
Inhar Urruzuno eta Iñigo Eizagirre, finalaurrekoa jokatu ondoren. Argazkia: Egursport. Inhar Urruzuno harrijasotzaile ondarrutarrak asteburuan Leitzan jokatu zen finalaurrekoan erraz gainditu zuen Iñigo Eizagirre Eiza-k egindako marka, eta horri esker 2021 Urrezko Harrijasotzaile Txapelketaren azken fasera igarotzeko txartela lortu du. 79 jasoaldi egin zituen, aurkariak baino hamar gehiago. Jon Irañetak ere finalaurrekoan egon behar zuen, baina min hartuta dagoenez, ezin izan zuen parte hartu.
Zortzi arroako harri bakoitzagaz bi minutu eta erdiko saioa egin behar izan zuten bi harri jasotzaileek. Urruzunori bigarren txandan aritzea egokitu zitzaion, eta modu horretara, aurkariaren erreferentziak jakinda ekin zion lanari. “Kopagaz topera jotzera irten nuen, eta hor abantaila lortzea zen nire helburua. Oso gustura ibili nintzen, eta aurkariarekiko zortzi jasoaldiko abantaila lortu nuen. Ezer arrarorik gertatu ezean, finalaurrekoa irabaziko nuela banekien”. Gorozikakoak 40 bidar jaso zuen 100 kiloko kopa, 18 bidar 100 kiloko kubikoa eta 21 bidar 100 kiloko bola. Eizak, ostera, 32 bidar jaso zuen 100 kiloko kopa, 19 bidar 100 kiloko kubikoa eta 18 bidar 100 kiloko bola.
Inhar Urruzuno 100 kiloko kopagaz lanean. Argazkia: Egursport.
Txapelketaren finala martxoaren 14an jokatuko da Azpeitiako Izarraitz pilotalekuan. Urruzunok beste bi arerioren aurka neurtu beharko ditu indarrak. Beñat Telleria eta hirugarren finalaurrekoaren irabazlearen aurka neurtu beharko ditu indarrak. Azken finalaurrekoaren irabazlea otsailaren 28an erabakiko da Mallabian; Mikel Lopetegi Urra, Gorka Etxeberria eta Jon Gisasola Zelai V egongo dira aurrez aurre.
Txapelketa hasi zuenean jarritako helburua beteta pozik agertu da ondarrutarra, baina txapela janztea zail ikusten duela aitortu du. “Zaila izango da, baina ez ezinezkoa. Helburu nagusia finalean sartzea zen, eta hori lortuta gustura nago. Hiru aste falta dira finalerako, ea sasoirik onenean ailegatzen naizen; nire aldetik, onena ematera aterako naiz plazara. Finala irabazteko faborito nagusia Urra da. Euskadiko txapelduna bera da eta dagoen mailan ikusita, finala irabazteko aukera handiak ditu”.
