Plaiko Zubiaren kolore berdea mantentzeko eskatu du Ondarroako Udalak
Aldundiak udalari esan dio zubia gris-urdindu kolorean margotuta ekarriko dutela. Udalak, ostera, azpiegiturari lekutik kendu baino lehen zeukan kolore bera emateko eskatu du.
Ondarroako Plaiko zubia, artxiboko irudian. Bizkaiko Foru Aldundiaren aurreikuspenak betetzen badira, udaberrian ipiniko dute bere lekuan Ondarroako Plaiko Zubia, eta udan egongo da erabilgarri. Zubia, baina, beste kolore batean margotuta ekarri dezaketela esan du Ondarroako Udalak. Izan ere, aldundiak udalari esan dionez zubia gris-urdindu kolorean (RAL 7500 kolorea) margotuta ekarriko dute. “Zubiaren goiko aldeko barandak eta bozelak ere grisak izango direla esan digute, eta egitura, ostera, beltza”.
Erabaki hori, baina, ez da udalaren gustukoa izan. Azpiegituraren baranda berdez eta egitura beltzez margotzea eskatu dute, “ondarrutarren memoria kolektibo bisualaren” kolorean; hau da, bere lekutik kendu baino lehen zeukan kolorean.”Udaleko hirigintza sailak behin baino gehiagotan eskatu dio aldundiari zubia berdez margotzeko, baita eskaera ofizial bidez ere”.
Eskaera ofiziala otsailaren 9an erregistratu zuten, eta hori, hain zuzen, azken urteetan ezagutu den kolorea mantentze aldera egin dutela esan dute, “herrian horrela dagoelako sutraituta. Momentuz ez dugu baiezkorik jaso, eta gris margotzeko asmoagaz jarraitzen dutela baieztatu dute”. Aldundiko iturriek HITZAri jakinarazi diotenez, bestalde, zubiaren behin-betiko kolorea zein izango den ez dago oraindik erabakita. “Koloreari dagokionez, oraindik ez da horri buruzko erabakirik hartu”.
Plaiko Zubiaren inguruan makinaria lagata dago, barikuan lanekin hasteko.
Zubiaren kolorea aldatzeko arrazoia azpiegituraren berezko kolorea berreskuratzea izan daiteke. 1927an inauguratutako azpiegitura jatorrian grisa zela ondorioztatu du Euskal Herriko Unibertsitateko ikerketa batek, eta aldundiak erabakia hortik abiatuta hartu duela ere esan dute udal iturriek. “Ikerketa horretan ondorioztatu da gris-urdindua dela; geruzaz geruza egin dute zubiaren azterketa EHUko IBeA (Ikerkuntza eta Berrikuntza Analitikoa) taldekoek”.
Zubia eraberritzeko lanei dagokienez, berriz, egitura dagokion lekuan ipini aurreko lanei jarraipena emango diete datozen egunotan. Astearen hasieran zubiaren zimenduak sendotzeko mikropiloteak ipintzen hastekoak ziren azpiegitura eraberritzen ari den Orion enpresako langileak, baina lanak barikuan [otsailak 26] hasiko dituztela iragarri dute. “Horretarako baldintzarik onenak barikuan egongo dira. 11:00ak inguruan hasiko ditugu lanak, itsasbeheran”.
