Lea-Artibaiko lau atleta Euskadiko txapeldun geratu dira
Pista estalitako Euskadiko Txapelketa lehiatu dute Lekeitioko Tximista Atletismo Taldeko bederatzi atletek eta Durango Kirol Taldeko Lea-Artibaiko zortzik.
Sarai Larrinaga, Izaro Aranburu eta Sara Asenjo, Donostian. Argazkia: Durango Kirol Taldea. Pista estalitako Euskadiko Txapelketa lehiatu dute asteburuan Donostiako Belodromoan, eta horretan parte hartu dute Lekeitioko Tximista Atletismo Taldean eta Durango Kirol Taldean dauden Lea-Artibaiko hainbat atletek. Horien artean, Durango KTko Urtza Agirre Lersundi ondarrutarra, Sarai Larrinaga Lejardi etxebarritarra eta Xabat Oar Arteta Urkidi aulestiarra eta Tximistako Naia Garetxana Urkidi Euskadiko txapeldun geratu dira, zein bere kategoria eta modalitatean.
20 urtez azpikoen kategoriako Oar Artetak Heptatlon proban irabazi du urrezko domina, eta Espainiako Txapelketa lehiatzeko sailkatu da. 60 m-ko lasterketa irabazi zuen, eta 6,35m-ko marka egin zuen luzera-jauzian. Bigarren jardunaldian, hezietan onena izan zen, eta pertika-jauzian bere marka hobetu zuen Aulestiko atletak.
18 urtez azpikoen kategorian ari da Larrinaga, eta pisu jaurkietan 12,82m-gaz lortu zuen garaipena. Lekeitioko Tximista Atletismo Taldeko Alaine Imaz Cortazar txapeldunorde geratu zen, 10,39m-gaz. Kategoria bereko 800m-ko lasterketa irabazi zuen Agirrek, 2:24.36 denboragaz. Bestalde, Unax Solabarrieta ondarrutarra laugarren sailkatu zen 400m-tan, bere marka hobetuz.
Garetxana 18 urtez azpikoen jauzi-hirukoitzean nagusitu zen, 11,22 m-ko margakaz.
Durangoko taldeko Sara Asenjo Arrien eta Izaro Aranburu Rementeria aulestiarrak ere Belodromoan egon ziren. 20 urtez azpikoetan, pisu jaurtiketan zilarrezko domina lortu zuen Asenjok. 4 kiloko pisuagaz 10,90m-ko marka egin zuen; 13,44m egin zituen Maria Okomo irabazleak, eta Tximistako Terese de Madariaga Landak brontzea lortu zuen, 9,15m eginda. Bestalde, Aranburu urrea lortzeko gertu egon zen, 18 urtez azpikoen 1.500m-ko proban. Bost minutu eta 10 segundoko denbora egin zuen Teresa Ibarbia txapeldunak, eta Aranburuk 61 ehuneneko gehiago behar izan zituen lasterketa amaitzeko.
18 urtez azpikoetan, Tximistako June Markes Rodriguez bigarrena izan zen 400 metrotan. Txapeldunagaz lehia estua eduki zuen. Natalia Solaun irabazleak 1:03.17 egin zuen, eta Markesek, berriz, 1:03.71.
Tximistako Aiora Gojenola Gorostolak ere zilarrezko domina eskuratu zuen 20 urtez azpikoen 400m-ko proban. 1:10.29 denbora egin zuen.
Leire Alonso, Jule Arkotxa, Ines Lauzirika eta Unai Urkiaga Lekeitioko atletismo taldeko kideak ere Belodromoko txapelketan aritu ziren.
