Hasi dira 90 urtetik gorakoak txertatzen
Neurriak malgutu dituzte zaharren egoitzetan: egoiliarrak astean lau adiz atera ahal dira, eta bi senideren beste horrenbeste bisita jaso ahal izango dituzte. Egoitzetan zahar izurriaren egoera «zeharo» aldatu dela iritzita malgutu dituzte neurriak.
Martxan da 90 urtetik gorakoen txertaketa Araban, Bizkaian eta Gipuzkoan. Gainera, Gipuzkoan, astelehenean [martxoak 1] hasi ziren txertoa jartzen desgaitasuna duten pertsonentzako eguneko zentroetako eta etxebizitzetako erabiltzaileei, baita horiek artatzen dituzten 55 urtetik gorako langileei ere.
Eusko Jaurlaritzako Osasun sailburu Gotzone Sagarduik azaldu zuenez, txertatzera osasun etxeetara joateko «erraztasunak» emango dizkiete adinekoei, baina behar badute, etxean bertan ere jarriko diete. Guztira, adin horretako 30.000 herritar daude Araban, Bizkaian eta Gipuzkoan.
Adineko batzuk txertatzeko zain dauden bitartean, beste batzuk jada eduki dute aukera. Araban, Bizkaian eta Gipuzkoan, esaterako, egoitza soziosanitarioetako egoiliarren eta langileen %97,3k lehen dosia jaso dute, eta %96,3k baita bigarrena ere. Hori dela eta, neurriak malgutu dituzte egoitzetan: egoiliarrak astean lau adiz atera ahal dira, eta bi senideren beste horrenbeste bisita jaso ahal izango dituzte. Araba, Bizkai eta Gipuzkoako aldundiek eta Osasun Sailak adostu zituzten neurriok astelehenean [martxoak 1], zahar etxeetan izurriaren egoera «zeharo» aldatu dela iritzita.
Jose Luis Quintas Eusko Jaurlaritzako Osasun sailburuordeak joan den astean adierazi zuen 100 urtetik gorako 1.800 adinekoetatik 800 ingururekin ezin izan direla harremanetan jarri txertaketarako, eta litekeena dela Benidormen egotea (Alacant, Herrialde Katalanak). Kritikak jaso ditu, eta Sagarduik onartu du «ez zuela asmatu» hitz horiekin, eta Osakidetza 100 urtetik gorako guztiekin jarri dela kontaktuan.
