Azken orduetan Markina-Xemeinen erregistratu dituzte kasuak
Zehatz esateko 5 kasu erregistratu dituzte azken orduetan Markina-Xemeinen. Gainerako herrietan ez dute kasurik erregistratu, eta Mutrikuk 0 tasa edukitzen jarraitzen du. Kontrolerako Osoko Bildura ere egin dute gaur Eusko Legebiltzarrean, eta Lehendakariak pandemiaren balantzea egin du.
Azken 24 orduetan bost kasu erregistratu dituzte Lea-Artibain, eta guztiak Markina-Xemeinen erregistratu dituzte. Horren ondorioz, Markina-Xemeingo intzidentzia tasak ia 100 puntu egin du gora; 179,10ko tasa edukitzetik 278,61 tasa edukitzera pasatu da. Azken egunetako joera mantenduz gero, Markina-Xemein gune laranjan sartuko litzateke (intzidentzia tasa 300 eta hortik gora denean sartzen da gune laranjan).
Gainerako herrietan ez dute kasurik erregistratu, eta intzidentzia tasak mantendu edo jaitsi egin dira; Ondarroako tasa jaitsi da. Mutrikuk, gainera, 0 tasa edukitzen jarraitzen du.
Herriz herriko intzidentzia tasa (eguneratuta):
- Amoroto: 0 (=)
- Aulesti: 0 (=)
- Berriatua: 159,11 (=)
- Etxebarria: 0 (=)
- Gizaburuaga: 0 (=)
- Ispaster: 0 (=)
- Lekeitio: 207,56 (=)
- Markina-Xemein: 278,61 (azken orduetan ia 100 puntu igo da)
- Mendexa: 0 (=)
- Munitibar: 0 (=)
- Mutriku: 0 (=)
- Ondarroa: 151,75 (azken orduetan 10 puntu inguru jaitsi da)
- Ziortza-Bolibar: 0 (=)
Gune gorrian dauden herrien zerrenda ere gaur [martxoak 4] eguneratu du Jaurlaritzak. Eta astelehenean [martxoak 1] 5.000 biztanle baino gutxiago zituzten herrien artean gune gorrian zegoen bakar bat ere ez bazegoen, gaur bai:
- 5.000 biztanletik gorako herriak: Oñati (793,51), Derio (608,92) eta Aretxabaleta (522,60).
- 5.000 biztanletik beherako herriak: Ibarra (1.021,83).
Bestalde, Kontroleko Osoko Bilkura egin da gaur Eusko Legebiltzarrean. Horretan, Iñigo Urkullu lehendakariak eta Eusko Jaurlaritzako sailburuek talde parlamentarioen galderei eta interpelazioei erantzun diete. Maddalen Iriarte EH Bildu taldeko legebiltzarkideak pandemiaren balantzea egiteko eskatu dio Lehendakariari. Eta, azken horrek, bi balantze egin daitezkeela esan du: giza balantzea eta kudeaketaren balatzea.
Giza balantzeari dagokionez, oroimena eta elkartasuna nagusitzen direla nabarmendu du. “Pertsona eta familia askok gertuko norbait galdu dute edo ospitaleratze luzeak jasan dituzte. Denok bezala. Hemen hitzak baino gehiago, gure enpatia eta elkartasuna adierazi nahi izan dugu”. Kudeaketaren balantzeari dagokionez, esan du birus ezezagun eta oso larri baten aurkako “borroka etengabearen kudeaketa” egin dela, “arazo oso larriak gainditzeko etengabeko lana”. Horren aurrean, zailtasun bakoitzari konponbide bat eman behar izan diotela gaineratu du: “Arazoak izan ditugu denok bezala eta izango ditugu, baina erantzun egin dugu”.
