Erkidegoen itxiera perimetralari eta etxeratze aginduari eutsiko diete Aste Santuan
Neurri murriztaileak adostu dituzte Espainiako Osasun Ministerioak eta autonomia erkidegoek.
Aste santuan ez dira neurri murriztaile nagusiak malgutuko. Hala adostu dute Espainiako Osasun Ministerioak eta Espainiako Estatuaren menpe dauden administrazioek (Eusko Jaurlaritzak eta Nafarroako Gobernuak barne), autonomia arteko Osasun Publikoko Batzordean. Erkidegoak perimetralki itxita egongo dira egun horietan, eta etxeratze aginduari eutsiko zaio 22:00etatik 06:00etara.
Mahai gainean zegoen beste neurri bat ere: ikasturtean beste erkidego edo herrialde batean bizi diren unibertsitate ikasleak beren ohiko bizitokira itzultzeko debekua. Azkenean, baina, puntu horrek ez du adostasunik lortu, eta bertan behera utzi dute. Hala ere, adostutako agirian gomendio gisara azaltzen da “ezinbestekoa ez den bidaia oro saihestea”.
Osasun Ministerioak autonomia erkidegoetako gobernuei eskatu die “alerta maila ez jaisteko”, azken asteotako adierazleak eta COVID-19aren transmisioaren bilakaera “positiboak” izan arren. Ekitaldi jendetsuak ere debekatuko dituzte egun horietan.
Hortaz, mugikortasuna mugatuta egongo da datozen asteetan, propio baimenduta dauden salbuespenen kasuan izan ezik; hala nola, “ohiko bizilekura edo familiaren etxera itzultzea”, adingabeak edo mendeko pertsonak zaintzea edota lanera joan behar izatea.
