Abian da Errigoraren udaberriko kanpaina
Martxoaren 24ra bitartean egin daitezke eskaerak. Oliba-olio birjina –5 litroko ontzia– eta kontserba, arroz eta pasta sortak —12 unitateka— eskatu daitezke.
Plateretik baratzera. Elikadura burujabetzarako bidea egiteko beste aukera bat eskura ipini nahi du Errigoraren udaberriko kanpainak. Martxoaren 24ra bitartean, Nafarroako uztaren alde eginez, etorkizuna bermatzeko oinarriak finkatu nahi ditu; plateretik hasita, kontsumo eta ekoizteko moduak aldatzeraino. Hain zuzen, kontsumitzaile eta ekoizleen arteko zubia auzolanean oinarrituta eraikitzeko helburua dauka Plateretik baratzera kanpainak. “Eserita itxaron ordez, aulkitik altxatu gabe egin baitezakegu bidea elikadura burujabetzara: jan dezagun pentsatzen dugunaren arabera”, diote kanpainaren bultzatzaileek.
[ESKAERA EGITEKO ATARIA, HEMEN!]
Produktuak. Oliba-olio birjina –5 litroko ontzia– eta kontserba, arroz eta pasta sortak —12 unitateka— eskatu ahalko dira. Eskala txikian ekoitzitako elikagaiak kontsumitzeko deia egiten du Errigorak, produktu agroekologikoak. Kontsumitzeko erak aldatuz, ekoizteko moduak aldatu daitezkeelako.
Pandemia egoerak hausnarketarako aukera eman die Errigorakoei, eta aurtengo kanpaina erronka bezala planteatu dute: “Hainbat produkturen ekoizpenean ditugun mugak ahultasun gisa beharrean, aukera gisa ikusi behar dugu; gaur eskaera indartuz gero, bihar produktuon ekoizpena indartzeko pausoak emateko moduan izango gara”.
Internet bidez egin daiteke eskaera. Baina, 848 87 12 23 telefono zenbakira deituta ere eskatu daitezke produktuak, edo inguruko arduradunari zuzenean eskaria eginez. Banaketa apirilaren bigarren hamabostaldian egingo dute, eta ohiko lekuetan jaso ahalko direla jakinarazi dute.
Bi otzararen zozketa. Lea-Artibai, Mutriku eta Busturialdeko Hitzak ere Errigoarren bi saski zozkatuko ditu harpidedun eta Hitzakide direnen artean. Hilaren 8tik 11ko 16:00ak arte zozketan parte hartzeko aukera egongo da.
