M-8: "Arduraz jokatuta" kalera ateratzea "beharrezkoa" dela diote Mugimendu Feministek
Pandemiaren eraginez emakumeen prekarizazioa handitu egin dela diote. Hona hemen Lea-Artibai eta Mutrikun antolatu dituzten ekintzak, herriz herri eta egunez egun.
Mugimendu Feministetako kideek argi daukate: “Koronabirusaren pandemiak eta haren kudeaketak baldintzatutako urte honetan, zaintzaren ardurarik handiena emakumeoi egokitu zaigu, bai zerbitzu publikoetan (osasungintzan, hezkuntzan, merkataritzan eta elikaduran…) baita etxebizitza barruan ere, etxeko lanen eta zaintza lanen banaketak ez direlako ekitatiboak”.
Emakumeen artean ere banaketa desorekatua dela aipatzen dute, “klase sozialaren eta migrazio estatusaren arabera”. Aulestiko Mugimendu Feministaren arabera, berdintasunik gabeko banaketa horrek gainkargaz eta emakumeen osasunari eta bizi kalitateari dakarzkien ondorioez gain, zaintza sistemaren prekarietatea azaleratu du, eta lehendik zeuden desberdintasunak gehitu ditu.
Aulestiarren ustez, egungo krisiak agerian utzi du elkar zaintzeko beharra, sareak sortzekoa, komunitatea eraikitzekoa: “Beharrezkoa da emakumeon lan prekarietatea eta pobrezia salatzea, indarkeria matxista guztien aurka egitea eta bazterkeria eta arrazakeriari uko egitea. Sistema kapitalista, heteropatriarkal, arrazista, kolonialista hau arrakalatzeko geure burua antolatu behar dugu, eta elkarrekin, taldean, borrokatzen jarraitu”.
Aulestin “autoantolaketaren beharra” azpimarratzen dute, «mugimendu feminista sendo batek berezkoak baititu emakumeon arteko elkarlana eta babesa». Era berean, emakume eta gizonen arteko benetako aukera berdintasuna aldarrikatu eta landu nahi dute, bizitzako esparru guztietan: hezkuntzan, lanean, familian, lagun artean, aisialdian… Bide horretan, hurrengo hilabeteetan Aulestiko Berdintasunerako I. Plana gauzatuko dela azaldu dute.
Konfinamenduaren kaltea. Aipatu dute, gainera, konfinamendu egoerak indarkeria egoerak emateko aukerak ere areagotu egin dituela: “Etxeetan sartuta eduki ditugu erasotua erasotzaileagaz 24 orduz”.
Emakundek ere zaintzagaz lotutako kanpaina abiarazi du aurtengo M8ra begira. Hain zuzen ere, zaintza lanak ikusarazteko, baloratzeko eta gizarte osoaren artean banatzeko beharra azpimarratzen du: emakume eta gizonen artean eta baita erakunde eta gizarte osoaren artean ere. Zaintza erdigunean jartzeko beharra feminismoaren aldarrikapen handietako bat dela gogorarazi du Emakundeko zuzendari Izaskun Landaidak.
Ondarroan, Berriatuan eta Mutrikun, esate baterako, etxeetako leihoak eta balkoiak morez, amantalez… janzteko deia egin dute
“Zuhurtzia” eskatu dute. Eusko Jaurlaritzak gogorarazi du ezin duela biltzeko oinarrizko eskubidea mugatzen duen inolako neurri murriztailerik hartu, baina osasun egoera kritiko honek «zuhurtasun eta zorroztasun handia» eskatzen duela M8-an osasun neurriak betetzeari dagokionean. Modu horretan, manifestazioetan eta bestelako ekitzetan parte hartzeko asmoa daukaten herritarrei eskatu die indarrean dauden osasun neurri guztiak betetzeko, «osasun kolektiboa zaintzeko». Gogorarazi dute, gainera, oraindik ere udalerrietako konfinamendua ezarrita dagoela.
Aulestiko Mugimendu Feministak argi dauka, eta kalera irtengo dira, “arduraz jokatuta eta osasun neurriak errespetatuta, pandemiagatik”. Hala eta guztiz ere, argi daukate badela beste pandemia bat: “Emakumeenganako indarkeria, emakume izate hutsagatik”.
M8ko borroka egunerokoa dela uste du Aulestiko Mugimendu Feministak, “eta era berean eguneroko borrokaren isla dira M8ko aldarrikapenak”.
Hala, Lea-Artibaiko eta Mutrikuko emakumeek kalera aterako dituzte aldarrikapenak eta hainbat dira herrietan antolatutako protesta eta jarduerak. Herri askotan, gainera, Ondarroan, Berriatuan eta Mutrikun, esate baterako, etxeetako leihoak eta balkoiak morez, eskegitako barruko arropez… janzteko deia egin dute.
