Hiru lurraldeen artean mugitu ahal da
Gainerako neurriak bere horretan mantentzen dira: pertsonen arteko bilerak 4 lagunetara mugatuta egoten jarraitzen dute, eta etxeratzeko aginduak ere 22:00etatik 06:00etara bitartekoa jarraituko du izaten.
Araba, Bizkai eta Gipuzkoa arteko mugikortasuna baimendu du Labi aholku batzordeak martxoaren 9tik aurrera, “inolako mugarik barik”; herrien itxiera perimetrala bertan behera uztea erabaki dute.
Etxeratzeko ordua eta pertsonen arteko bilerak orain arte zeuden modura mantetzea erabaki dute. Hau da, martxoaren 9tik aurrera ere etxeratzeko agindua 22:00etatik 06:00etara izango da, eta pertsonen arteko bilkurak 4 lagunetara mugatuta egoten jarraituko du. Ostalaritza establezimenduek ere 20:00etan itxi beharko dute, orain arte modura. Hiru lurraldeen arteko mugikortasuna urtarrilaren 13tik egon da debekatuta.
Koronabirusaren hedatzeari aurre egiteko neurri horiek hogei egun barru aztertuko ditu atzera Labik. Hala ere, Urkulluk adierazi du ez direla “agertoki oparorik” aztertzen ari, eta ez dituztela bertan behera utziko gainontzeko neurri murriztaile guztiak.
Esan dute neurriak martitzenetik aurrera [martxoak 9] indarrean egongo direla astelehenean [martxoak 8] Emakumeen Nazioarteko Eguna delako eta gehiegizko mugikortasuna ez ahalbidetzeko.
Neurriak gehiago malgutzeko, zenbaki bat errepikatu du lehendakariak: 60 kasuren intzidentzia tasa izan nahi dute hiru lurraldeetan. “Hori da agertokirik egokiena”
Egungo egoera aztertuta, Urkulluk adierazi du udalerrien itxiera ez dela “beharrezkoa” dagoeneko. Horrez gain, ezabatu egingo dute udalerriko murrizketak zehazteko azken hilabeteetan erabili duten 500etik gorako intzidentzia-tasa metatuaren erreferentzia. “Une honetan ez dago ia udalerririk erregistro horren gainetik”.
Neurriak gehiago malgutzeko, zenbaki bat errepikatu du lehendakariak: 60 kasuren intzidentzia tasa izan nahi dute hiru lurraldeetan. “Hori da agertokirik egokiena, horrek izan behar luke euskal gizarte guztiaren konpromisoa».
Lehendakariak esan du “urte gogorra” izan dela, “zailtasunez eta oztopoz betetakoa”. Labin hartutako neurriak “kontu handiz” hartu izan dituztela gaineratu du. “Azken hilabeteetako bilakaera positiboa nabarmena izan da. Gaur gaurkoz 230 kasuko intzidentzia metatua daukagu. Beheranzko joera hori zer edo zer moteldu da azken egunetan”. Egoerak “hobera” egin badu ere, etorkizun hurbilera begira “zalantzak” dituztela esan du.
“Une kritikoan” gaudela gaineratu du. “Zuhurtasun osoa mantendu behar dugu, eta indarrean dauden neurri murriztaileak malgutzeko baldintzak ez direla betetzen uste dugu. Adostu dugu neurri horien iraupena luzatzea”.
Autonomia erkidegoak itxita egoten jarraituko du, gutxienez Aste Santua pasa arte. Hori, hain zuzen, autonomia arteko Osasun Publikoko Batzordean erabaki dute asteon. Osasun Ministerioak autonomia erkidegoetako gobernuei eskatu die “alerta maila ez jaisteko”, azken asteotako adierazleak eta COVID-19aren transmisioaren bilakaera “positiboak” izan arren. Ekitaldi jendetsuak ere debekatuko dituzte egun horietan.
Beraz, erkidegoen arteko mugikortasunak mugatuta egoten jarraituko du datozen asteetan ere, propio baimenduta dauden salbuespenen kasuan izan ezik; hala nola, “ohiko bizilekura edo familiaren etxera itzultzea”, adingabeak edo mendeko pertsonak zaintzea edota lanera joan behar izatea.
