Zabalik dago Markina-Xemeingo Sorginzulue gaztelekua
Udalak eta MAXEk hitzarmena sinatu zuten atzo [martxoak 4], eta horretan jaso dute Gaztelekua gaurtik [martxoak 5] ekainaren 30era arte zabalik egotea.
Luis Egurrola Markina-Xemeingo alkatea, erdian, MAXEko ordezkariekin hitzarmena sinatzen. Argazkia: Markina-Xemeingo Udala. Markina-Xemeingo Udalak eta herriko Gaztelekua kudeatzen duen MAXE elkarteak hitzarmena sinatu zuten atzo [martxoak 4], eta adostu dute Sorginzulue gaztelekua berriro zabaltzea. Gaurtik [martxoak 5] ekainaren 30era bitartean egongo da zabalik. Esan dutenez, gaztelekuko talde eragile guztien arteko adostasunari esker hartu da erabakia: Bekobenta, Berakruz eta Batetaratze guraso elkarteak, MAXE eta Markina-Xemeingo Udala. Udaleko bi alderdi politikoak ere ados agertu direla azpimarratu dute.
COVID-19ari aurre egiteko neurri bereziekin zabalduko da gaztelekua. “Kontingentzia Plan zehatz bat landu da, segurtasun eta higiene neurriak zehaztuz. Eta neurri horiek guztiak betetzeko konpromisoa hartu dute zerbitzuaren arduradunek eta baita ere erabiltzaileek”.
Zerbitzua berriro martxa jartzeko, udalak 13.100 euro bideratuko ditu gaztelekura. “Diru horrekin langileria gastuak, materiala, formazioa eta kudeaketa gastuak ordainduko dira”. Gaineratu dute azken bi urteetan udalak hainbat inbertsio egin dituela gaztelekuan: berogailua, sukaldea, ateak, leihoak…
Gaztelekua herriko 12-16 urte bitarteko gazteei zuzenduta dago, eta barikuetan (17:00etatik 21:00etara), zapatuetan (16:00etatik 21:00etara) eta domeketan (16:00etatik 20:00etara) egongo da zabalik. Aurreratu dutenez, askok izena eman dute.
