Txakurgunea zabaldu dute Markina-Xemeinen
Gunea Xemeinen dago eta 24 orduz egongo da zabalik, egunero. Txakurrak solte ibili ahalko dira bertan. Txakur jabeen kontzientziazioa bilatzen duen kanpaina ere jarri du martxan Markina-Xermeingo Udalak.
Xemeingo txakurgunea. Argazkia: Markina-Xemeingo Udala Zure txakurra, zure ardura txakur jabeen kontzientziazioa bilatzen duen kanpaina jarri du martxan Markina-Xermeingo Udalak. Kanpaina horren bidez, herritarren eta txakurren arteko bizikidetza hobetu nahi dute, errespetuzko elkarbizitza baten alde.
“Kanpainaren bidez, txakur jabeen eskubide eta betebeharrak gogorarazi nahi dira. Izan ere, animalia bat duen pertsona orok eskubide eta betebeharrak ditu; besteak beste, espazio publikoan animalia lotuta eramatea, bere kakak jasotzea eta txakurrari muturrekoa jartzea, arriskutsua izan badaiteke”, azaldu dute.
Animaliak sartu ezin diren espazioak errespetatu egin behar direla dio udalak, eta animalientzako baimendutako espazioak erabili, eta arau horrek ez betetzeak indarrean den legediaren araberako zigorrak ekar ditzakeela ohartarazi dute. “Txakur jabe gehienek arau hauek betetzen badituzte ere, txakur kaken kasuan, adibidez, nahi baino gehiagotan ikusten dira herriko kaleetan. Sortzen duten zikinkeriaz gain, txakurren gorotzak infekzio iturri ere badira, eta beraz, osasun arazo izan daitezke”.
Txakurgunea, Xemeinen. Betebeharrez gain, txakurrek eta euren jabeek eskubideak ere badituztela gaineratu dute. Hori dela eta, txakurrei eta euren jabeei espazio berri bat eskaini asmoz Txakurgune bat prestatu dute Xemein etorbidean, hilerriaren alboan dagoen aparkaleku ondoko belardian. Txakurgunea gaur zabaldu dute, eta 24 orduz egongo da zabalik, egunero. “Txakurrak solte ibili ahal dira bertan, baina kontrolpean egon beharko dira une oro, eta jabeek dagozkien betebeharrak bete beharko dituzte. Besteak beste, kakak jaso beharko dira eta ingurua garbi mantendu”.
Zakarrontziak jarri dituzte gunean baita iturri bat eta animalientzako hainbat jolas ere. “Segurtasunagatik, umeak heldu bategaz eta euren ardurapean sartu ahal izango dira soilik”, azpimarratu dute. Neurriak errespetatzeko eskaria egin du udalak, eta arazorik izanez gero, udaltzaingora deitu ahalko dute erabiltzaileek, astelehenetik zapatura, 08:00etatik 22:00etara (656 79 11 44).
