Amaia Antxustegi lekeitiarra Iraunkortasun eta Ingurumen Naturaleko diputatu izendatu dute
Gaur [martxoak 16] goizean eman du izendapenaren berri Unai Rementeria Maiz Bizkaiko ahaldun nagusiak. Gaur arte, Lekeitioko Udaleko alkateorde eta zinegotzia izan da Antxustegi.
Amaia Antxustegi. Argazkia: Bizkaiko Foru Aldundia Bizkaiko Foru Aldundiko ahalduna izango da Amaia Antxustegi Ziarda lekeitiarra. Gaur [martxoak 16] goizean eman du Bizkaiko Foru Aldundiaren gobernu aldaketaren berri Unai Rementeria Maiz ahaldun nagusiak, Gobernu Kontseiluaren ostean. Izendapen berri bi egin dituzte. Alde batetik, Antxustegi Iraunkortasun eta Ingurumen Naturaleko ahaldun berri izango dela jakitera eman du, eta bestetik, Elisabete Etxanobe Landajuela Administrazio publiko eta erakunde arteko harreman saileko ahaldun. Ibone Bengoetxea eta Elena Unzueta ordezkatuko dituzte.
Antxustegi, Zuzenbide Ekonomikoan Lizentziaduna, Bizkaiko Foru Aldundiko Administrari Orokorreko Teknikaria izan zen eta Emakume eta Familia Zerbitzuan jardun zuen 2015era arte. 2007.urtetik 2021era arte, Lekeitioko Udaleko zinegotzia izan da EAJrekin, eta azken sei urteetan alkateordea eta Gizarte Politikak, Emakumea eta Berdintasuna eta Herritarrekin Harremanak, Udal Barne Antolamendua eta Giza Baliabideak arloetako arduradun politikoa.
Indarrez aurre egiteko. COVID-19 gaitza gainditutakoan Bizkaia berriro bizkortu beharko dela esan du Rementeriak, eta horretarako gobernu “indartsu, haize berritu eta iniziatibaz betetako” bat beharko dela nabarmendu du. “Bizkaiak proiektu gehiago behar ditu, erronka gehiago eta proiektu berri horiek gobernu fresko bat behar dute, indarrez beteriko gobernua eta proiektuak aurrera ateratzeko ekimenez betea”.
Rementeriak dionez, “indarra, ilusioa eta proiektuak” badituzte, baina unea heltzen denean “topera egotea” bermatu nahi dute, aldundiari bultzada berria emateko. “Nik uste, bermatze hori aldaketekin bakarrik lortzen da”.
