Markina-Xemeingo Udala Erregistroen Interkonexio Sisteman sartu da
Herritarrek dokumentazioa beste administrazio batzuetara bidali ahal izango dute udalaren bitartez, horietara joan beharrik barik.
Markina-Xemeingo Herritarren Arreta Zerbitzua. Argazkia: Markina-Xemeingo Udala Markina-Xemeingo Udalak administrazio publikoen artean dokumentu elektronikoak trukatzeko sistema ezarri du. Erregistroen Interkonexio Sistemaren (SIR) bidez herritarrek dokumentazioa beste administrazio batzuetara bidali ahal izango dute udalaren bitartez, administrazio horietako arreta bulegoetara joan beharrik barik.
Jakitera eman dutenez, sistema horren barruan daude besteak beste Eusko Jaurlaritzako eta Foru Aldundietako sail batzuk –Hezkuntza, Ogasuna, Lana eta Enplegua, Osasuna…–, Gizarte Segurantza, Trafikoa, Lanbide, Ertzaintza, Kontsumobide, Mankomunitateak eta udalak. “Etorkizunean geroz eta administrazio gehiagok sistema honekin bat egitea aurreikusten denez, aukerak geroz eta ugariagoak izango dira”, gaineratu dute.
Sistema horregaz paperaren erabilera eta zirkulazioa gutxitzeagaz gain kostuak murriztu eta efizientzia areagotzen dela azaldu dute. Izan ere, modu telematikoan bidaltzen da dokumentazioa eta beste administrazioak bere erregistroan jasotzen du zuzenean. “Sistema honegaz pertsonen lekualdatzeak murrizten dira, eta, beraz, tramitazioa erraztu eta azkartu egiten da”.
Sistema horren parte izatea urrats garrantzitsua dela nabarmendu du udalak, administrazio elektronikoa behin betiko ezartzen joateko. “Azken urteotan agerian geratu da Internet bidezko tramitazioaren gorakada, aurrerapen teknologikoek eraginda hein handi batean. Covid-19ak eragindako egoerak areagotu eta berretsi baino ez du egin tendentzia hori”.
