Jaitsiera saihesteko erronka dauka Aurrerak
Hirugarren Mailan azken jardunaldia lehiatuko dute asteburuan. Aurrerak Urgatziren kontra jokatuko du Zaldupen. Apirilaren bigarren asteburuan hasita, ostera, jaitsiera kanporaketak lehiatuko ditu.
Aurreko jardunaldiaren Somorrostroren kontrako partiduaren hamaikakoa. Argazkia: Leartigol. Ligaren azken jardunaldia da asteburukoa Hirugarren Mailan. Aurrerak Urgatzi hartuko du Zaldupen, zapatuan [martxoak 20], 17:00etan.
Gero, bi asteko etenaren ostean, apirilaren bigarren asteburuan hasita, mailari eusteko borrokatzea egokituko zaio jaitsiera kanporaketetan. Hain zuzen, sailkapenaren behekaldean dago talde ondarrutarra. Zortzigarren dago 17 puntugaz–10 partidu galdu, 4 irabazi eta 5 berdindu ditu–.
Abendutik Ondarroan. Iñaki Garcia abenduaren erdialdean hasi zen Aurrera entrenatzen. Taldea sailkapenaren azken postuan zegoen, lau puntugaz. Egoera zailean heldu zen, baina taldea ondo ezagutzen zuen, aurreko denboraldian igoera lehiatu baitzuen bere kontra Elorrioko entrenatzaile moduan, eta orduko taldeko hamasei jokalari daude gaur egun.
Denboraldi honetan Aurrerak “bi aurpegi” dauzkala zehaztu du: bata etxean eta bestea kanpoan. Zaldupen “fidagarri” eta kanpoan “prestutasun faltagaz” ikusi du taldea: “Hori aldatzeko lantzen ari gara. Zenbaki aldetik emaitzak lortu ez arren, taldeak etxean maila onean jokatu du. Kanpoan talde ahula izan da”.
Azken bi jardunaldiak irabazi dituzte, azkena etxetik kanpo (0-2): “Aurreko jardunaldian, Somorrostroren kontra oso ondo egon ginen. Partidu oso konpletoa jokatu genuen. Oso ondo defendatu genuen. Serio jokatu genuen, eta taldea gustatu zitzaidan”. Garciaren ustez, Zaldupen puntu gehiago ateratzeko aukera eduki dute, eta “puntu gehiago merezi” izan dituzte, eta kanpoan, “seguruenik gutxiago”.
Biharko partidua Urgatzi sailkapeneko azkenaren kontrakoa da, eta azpimarratu du irabazteko “betebeharra” daukatela: “Urgatzik baino maila hobea daukagu, eta irabazteak bigarren fasea borrokatzeko esperantza emango lioke klubari”. Azken jardunaldietako bolada ona borobiltzeko garaipena litzateke.
Klubaren mendeurrenekoan, mailari eustea «garaipen handia» litzateke ondarrutarrentzat. “Datozen partiduetan jokoaren alderdi asko menderatzea lortu behar du taldeak, eta ez bakarrik bera eroso sentitzen direnak. Klubak badaki nondik datorren eta noren kontra lehiatzen den. Ekonomikoki klub indartsuak daude, fitxaketak egiteko ahalmenagaz. Guk etxeko jokariekin jokatzen dugu. Ea taldea noraino heltzen den; itsasertzera ailegatzen saitu behar gara”.
Argazkia: Leartigol.
