Lekeitioko Udako Arte Erakusketan izena emateko epea zabaldu dute
Urtero modura, uztailean eta abuztuan egingo da erakusketa. Alor ezberdinetako artistek parte hartu dezakete.
Aurten ere, Udako Arte Erakusketa antolatuko du Lekeitioko Udalak, eta bertan parte hartzeko aukera zabaldu dute. Diziplina ezberdinetako artistek parte hartu dezakete erakusketan; apirilaren 17ra arte egongo da izena emateko epea zabalik.
Erakusketan parte hartu nahi duten artistek Lekeitioko Kultur Etxera joan daitezke izena ematera, edo bestela Kultur Etxeko helbide elektronikora idatzi (kulturetxea@lekeitio.eus). Izena ematerakoan artistek euren lanaren argazkia eta dokumentazioa –biografia eta erakusketaren azalpenak– aurkeztu beharko dituzte. Udaleko kultura sailak ebaluatuko ditu lanak ondoren.
Jakitera eman dutenez, maiatzaren hasieran aurkeztuko dute onartuen eta baztertuen zerrenda, eta onartuen artean zozketa bat egingo dute behin betiko parte hartzaileak hautatzeko. Lekeitioko eta eskualdeko artistek lehentasuna edukiko dutela azpimarratu dute.
Uztailean eta abuztuan egongo da martxan Lekeitioko Udako Arte Erakusketa Eskolape Aretoan, eta artista bakoitzaren erakusketaren iraunaldia bertan parte hartzen duten artista kopuruaren araberakoa izango da. “Hasiera batean, erakusketak astebetekoak izango dira, baina aste bira ere luzatu daitezke aurkezten den partaide kopurua handiegia ez bada”, azaldu dute.
Udako Arte Erakusketaren oinarriak Lekeitioko Udalaren webgunean daude ikusgai.
