Markina-Xemeingo Udalak herritarren iritzia jasoko du Berdintasun eta Energia Planak diseinatzen hasteko
Galdetegiak banatu dituzte etxez etxe, eta internet bidez ere erantzuteko aukera egongo da. Galdetegiak bidaltzeko azken eguna martxoaren 26a izango da.
Herriko Emakume eta Gizonen Berdintasunerako II. Plana disenatzen hasiko da Markina-Xemeingo Udala. Lana datozen hilabeteetan burutuko dutela azaldu dute, herritar guztiei zabalik egongo den dinamika parte-hartzaile baten bidez eta Murgibe aholkularitzaren laguntzagaz.
Zehaztu dutenez, modu koordinatuan lan egingo da udal langile, politikari eta herriko eragileekin batera: “Besteak beste, topaketak, elkarrizketak eta galdetegiak egingo dira. Horrez gain, datuak eta estatistikak berrikusiko dira, emakume eta gizonen arteko berdintasunaren arloan izan diren aurrerapenen eta hobetu beharreko gaien berri izateko”.
Prozesu guzti horretan herritarren eta eragileen parte hartzea sustatu nahi du udalak, “esparru honetan informazio iturri garrantzitsuak direlako”. Hori dela eta, ideiak eta proposamenak eman ahal izateko galdetegi bat prestatu dute. Galdetegi horiek etxez etxe ari da banatzen udala. Hala ere, galdetegia Internet bidez ere lortu ahalko da udalaren webgunean, eta bete eta gero, emailez bidali daiteke komunikazioa@markina-xemein.eus helbidera. Galdetegiak bidaltzeko edo udaletxean bertan entregatzeko azken eguna martxoaren 26a izango da.
Energia Plana. Emakume eta Gizonen Berdintasunerako II. Plana osatzeko galdeketagaz gainera, Energia Planari buruzko beste galdetegi bat ere aurkituko dute postontzian markina-xemeindarrek. Iragarri duenez, Energia Plana lantzen ere hasiko da udala, Barrizar enpresagaz, eta lan horren lanketa eta garapenerako ere herritarren iritzia ezagutu nahi dute. Besteak beste, herritarrek klima aldaketaren eta energia berriztagarrien inguruan daukaten iritzia ezagutu nahi dute.
“Markina-Xemeinek urteak daramatza eraginkortasun energetikoaren arloan norabide onean urratsak ematen. Hala ere, etorkizunera begira eman beharreko pausoak zehazteko, bide-orri bat zehazteko beharra ikusi du udalak”, azaldu dute. Jakiteira eman dutenez, besteak beste, Europar Batasunak finkaturiko helburuak betetzea izango du helburu planak: “Horien artean aipatzekoak dira CO2 isuriak gutxitzea edota erabiltzen diren energia iturriak gutxieneko ehuneko batetik gora berriztagarriak izatea. Hori horrela, datozen 20 urteetarako ibilbidea zehaztea izango du helburu planak”.
Energia Planari buruzko galdetegia ere udaletxean entregatu behar da, edo kanpoko postontzian sartu. Eskuragarri egongo da baita ere udalaren webgunean, eta bete ondoren posta elektronikoz bidali ahalko da.
