'Non dago Mikel' dokumentalaren proiekzioak, Lekeition
Barikuan [martxoak 19] proiektatuko dute ikus-entzunezkoa. Saio bi eskainiko dituzte, 17:00etan eta 19:00etan. Egileek eta Zabalzaren senideek diote dokumentalak torturaren kutxa berriro irekitzea lortu duela
Mikel Zabalzaren auzia argitzea helburu duen Non dago Mikel? dokumentala barikuan [martxoak 19] proiektatuko dute Lekeitioko Ikusgarri zinema aretoan. Saio bi eskainiko dituzte, 17:00etan eta 19:00etan.
Ikus-entzunezkoa Amaia Merino eta Miguel Angel Llamasek idatzi eta zuzenduta dago, eta iaz aurkeztu zuten, Donostiako Zinemaldian. Zinema aretoetan, baina, otsailaren 26an estreinatu zen. Egun horretan bertan, Zabalza Intxaurrondon torturatuta hil zutela frogatzen duen grabazio bat zabaldu zuen Espainiako komunikabide batek.
Dokumentalagaz, Merinok eta Llamasek Mikel Zabalzaren auziaren erantzuna erakutsi nahi izan dute ezbeharra gertatu zenetik 25 urte pasa direnean.
Egileek eta Zabalzaren senideek esan dute estreinaldiagaz torturaren kutxa berriro irekitzea lortu dela. Madrilgo (Espainia) estreinaldian Pablo Iglesias Espainiako Gobernuko presidenteorde eta Irene Montero Berdintasun ministroak ere parte hartu zuten. Iglesiasek esan zuen Espainian torturatu egin dela eta hori Espainiako demokraziarentzat «lotsagarria» dela.
Asteon, gainera, Zabalzaren hilketa hizketagai izan da Espainiako Kongresuan; Aitor Esteban EAJren diputatuak Fernando Grande-Marlaska Espainiako Barne Ministroari auziaz galdetu zion.
