Aurrerak Urgatziri irabazi dio Zaldupen
Hirugarren Mailaren azken jardunaldian, Aurrerak 4-1 irabazi dio Urgatzi KKri. Amaitu berri duten ligaren lehen fase honetan, 20 puntu bildu ditu talde ondarrutarrak, eta zortzigarren sailkatu da.
Argazkia: Ondarroako Kirolaren Leihoa. Azken jardunaldirako helburua bete du Aurrerak. Iñaki Garcia entrenatzaileak esan modura, Urgatziri irabaztea zen ondarrutarren “betebeharra”, eta Aurrerak 4-1 irabazi zion talde gasteiztarrari, zapatuan [martxoak 20], Zaldupen.
10. minutuan, Extremianaren golari esker, 0-1 aurreratu zen Urgatzi KK. Bost minutu beranduago heldu zen banako berdinketa ezarri zuen gola. Eñautek sartu zuen Aurreraren lehenengo gola, eta bera izan zen lehenengo zatia amaitzeko bi miñuturen faltan 2-1ekoa lortu zuena. Bigarren zatian, garaipena bermatzeko sufritu egin zuten etxekoek. Izan ere, azken bost minutuetan erabaki zen partidua. 86. eta 89. minutuan bi gol egin zituen Aurrerako Etxebarriak.
Ondarroako taldearen entrenatzaileak adierazi duenez, Urgatzi azken sailkatuari irabaztea ez zen erraza izan, “presaz” jokatu zuten. Partidu osoan zehar “urduri” egon zirela zehaztu du: “Joko aldetik bagenekien ez zigutela minik egingo, baina amaierara arte ez genuen partidua erabaki. Teorian multzoko talde ahulena da eta gure betebeharra zen irabaztea. Oso prezipitatuta aritu ginen, antsietate handiagaz. Ondo jokatu ez arren, egindakoak garaipena lortzeko balio izan zigun. Uste dut beste talde bategaz ez ligukeela balio izango, joko aldetik gehiago egin beharko genukeelako”.
Sailkapena. Talde ondarrutarrak 20 puntugaz zortzigarren amaitu du, eta bi aste barru jaitsiera kanporaketak lehiatuko ditu. Tolosa, Balmaseda, Somorrostro eta Urgatzi ere mailari eusteko borrokatuko dira. Urgatzi da sailkapeneko azkena, 10 puntugaz. Sailkapenaren beste muturrean, Gernikak amaitu du multzo buru, 43 puntugaz. Hiru puntu gutxiago pilatu ditu Real Sociedad Ck, eta Sestao River hirugarrenak 39 puntu lortu ditu amaitu berri duten ligaren lehen fase honetan.
Bi asteko etenaldi hau “gehiegizkoa” dela deritzo Garciak, eta “inori ez diola onurarik eta mesede egiten”. Zapatu goizean [martxoak 27] lagunartekoa jokatuko dute Urdulizen.
Argazkia: Ondarroako Kirolaren Leihoa.
