Eliz Ateako gasolindegia turismo bulego bihurtzen hasiko dira
Azken osoko bilkuran ia 400.000 euroko kreditu aldaketa onartu zuen udalak inbertsioetarako; diru kopuru horretako zati bat gasolindegi zaharraren eraikina berriztera bideratuko dute.
Lekeitioko gasolindegi zaharra. Eliz Atea kaleko gasolindegi zaharra berreskuratzen hasi nahi du Lekeitioko Udalak. Lekeitioko erdigunetik hurbil egonik, eraikin hori turismo bulego berria kokatzeko gune ezin hobea dela baloratu dute, eta eraikina berrizteko proiektua eginda, bi urte barru turismo bulegoa bertan egotea nahi dute.
Eliz Atean kokatuta dagoen eraikina, Alvaro Libano arkitektoak diseinatu zuen 1962 urtean, eta Nazioarteko Abangoardia edo arrazionalismo estilokoa da. Urte horretatik eta 2007ra bitartean gasolindegia egon zen bertan. “Gure ideia jatorrizko estilo arkitektonikoa berreskuratzea da, eta bi fasetan egingo dira lanak”, azaldu du Koldo Goitia Lekeitioko alkateak.
Udalak ia 400.000 euroko kreditu aldaketa onartu zuen azken osoko bilkuran aurtengo lehen inbertsioak egiten joan ahal izateko, eta horien artean dago gasolindegiaren berreskuratze proiektua. “Iazko eta aurreko urteetako diruak ixten ditugunean ikusiko dugu ze beste inbertsio egin ahalko diren”, azaldu du alkateak.
Azken urteetan gasolindegiaren inguru hori hobetzeko hainbat lan egin ditu udalak. 2016 urtean hasi ziren lanekin. Orduan, gasolindegi zaharraren inguruko lurzorua aztertu zuten kutsatutako lurzoruaren aitorpena egiteko eta saneatzeko prozesuak eta obrak egin zituzten. Bestalde, gasolindegiko lurzorua ordenazioz kanpo zegoela eta, arau subsidiarioen aldaketa puntuala egin zuten, berton esku hartu ahal izateko eta bere erabilera aukerak gehitzeko.
Lekeitioko basilika eta gasolindegiaren arteko bidean urbanizazio lanak hasi eta erromatarren sasoiko aztarnak ere agertu ziren 2018 urtean, Kristo aurreko II. mende ingurukoak hain zuzen ere. Hori dela eta, gasolindegi zaharreko obra luzatu egin zen.
Joan den urtean eman zituen udalak eraikina berrizteko proiektua idazteko lanak.
