Esan sindikatuak zalantzan jarri du Mutrikuko udaltzainen eta herritarren segurtasuna
Sindikatuak dio Mutrikuko Udaltzaingoaren lantaldea txikia dela baina udalak ez duela nahi udaltzain gehiago kontratatu. Esanek gaineratu du arreta jarri nahi dutela bikoteka lan egiteko dagoen premian.
Sindikatuak esan du Mutrikuko Udaltzaingoan askotan sortzen dela lantaldea osatzeko “nolabaiteko arazoa”. Udaltzainei dagokien zereginetan, “gehienetan” agente bakar batek erantzun behar izaten duela gaineratu dute. “Udalak langile gehiago kontratatzeari uko egiten dio, eta langileen gabezia egutegiaren etengabeko egokitzapen jasanezinekin konpontzen dute”. Horren aurrean, mutrikuarren segurtasuna eta udaltzainena eurena ere zalantzan jarri dituzte.
Esan sindikatuko kideek esan dute Mutrikuko udal gobernu taldeko arduradunekin hainbat bilera eduki dituztela, eta bilera horietan behin eta berriz azaldu dutela lantaldea osatzeko eta udaltzainen kopuru nahikoa finkatzeko beharra dagoela. “Udaltzain gehiago behar dira eguneroko lanak egiteko, batez ere herriko agenteei behin eta berriz euren eskumenekoak ez diren zereginak betetzeko eskatzen ari zaienean”.
Sindikatuak dio udalarekin edukitako bilera horietatik gobernu taldeak egindako promes hutsak besterik ez dituztela atera. “Bilera horien helburua izan da aurretiaz barne mailan behin baino gehiagotan salatutako nazka aldi baterako baretzea”.
Salaketa eginda, Esanek dio arreta jarri nahi dutela bikoteka lan egiteko dagoen premian, “batez ere pandemiatik jasotako tentsio sozialeko garai hauetan”. Bakarka lan egiteak udaltzainen arriskua areagotzen duela diote. “Horren adibide da Urasamendik kalean gertatutako suteari agente bakar batek erantzun behar izan ziola. Eta baita ere beste agente batek joan den astean eduki zuen eraso saiakera”.
