Gaviotako lan istripuan hildako herritarraren heriotza salatu dute Lekeition
Lan arloan ematen den prekarizazioak ondorio lazgarriak dituela azpimarratu dute. Hamabi dira, urte hasieratik Euskal Herrian hildako beharginak.
Gaviotako lan istripua salatzeko manifestazioa Lekeitioko portuan zehar. Argazkia: Karpanta Manifestazio jendetsuak zeharkatu zituen zapatuan [martxoak 20] Lekeitioko kaleak, Bermeoko Gaviotan hil den lekeitiarraren heriotza salatu eta lan eta bizitza duinak aldarrikatzeko. Manifestazioa 12:30ean abiatu zen Eskolapetik eta udaletxe aurreko eskaileratan amaitu zen ekitaldi bategaz. Bertan gogora ekarri zutenez, lekeitiarraren heriotzagaz, hamabi dira guztira, urte hasieratik Euskal Herrian hildako beharginak, eta Joaquin Beltranek urte bete baino gehiago darama Zaldibarko zabortegian lurperatuta. “Lan istripuak benetako sarraski bat dira, 2020an 65 langilek galdu zuten bizia”.
Heriotza guzti horiek prekarietatearen ondorio direla azpimarratu zuten, eta benetako politikak eskatu zizkieten erakundeei, heriotzak, istripuak eta laneko gaixotasunak saihesteko: “Enplegu eta lan baldintza txarrak, azpikontratazioa, behin-behinekotasuna eta prebentzio erreal eta eraginkor ezaren ondorio dira. Administrazio publikoak egoera horren konplize bihurtu dira. Beste alde batera begiratzeari itxi, eta behingoz lan osasun politikak errotik aldatu behar dituzte”.
Udaletxe aurreko eskaileratan lan istripua salatzeko egin zen amaierako ekitaldia. Argazkia: Karpanta
Prekarietateagaz amaitu eta lan eta bizi baldintzak hobetzea dela esan zuten lan istripurik ez egoteko berme bakarra, eta hori lortzeko borrokan jarraitu behar dela gaineratu zuten. “Prekarietatea izanik lan heriotzen kausa, prekarietatearen kontrako borrokak garrantzi berezia hartzen du. Herritarron lan, pentsio eta bizi baldintzak duintzeko urgentzia benetako arazo politiko bilakatu arte kaleak hartzen jarraitu behar dugu”.
La Gaviotako istripuan hil zen herritarraren senide eta gertukoei elkartasun eta babesa adieraziz amaitu zuten ekitaldia.
