Lekeitioko turismo bulegoak bere eskaintza handituko du Aste Santuan
Marierrota ere berriro irekiko dute eta Santa Katalina Itsasargiak ere bisitak jasoko ditu.
Lekeitioko Turismo Bulegoa. Aste Santura begira bisitariak hartzeko prestatzen ari dira Lekeition. Turismo bulegoak bere ordutegia luzatuko du, eta bisitak egin ahalko dira Marierrotara eta Santa Katalina itsasargira.
Apirilaren 1etik 4ra bitartean, 10:00etatik 15:00etara eta 16:00etatik 19:00etara irekiko ditu ateak Lekeitioko Turismo bulegoak, beste egunetan berriz, bere ohiko ordutegia mantenduko dute: martitzenetik zapatura, 10:00etatik 14:00etara eta 16:00etatik 18:00etara eta domeketan 10:00etatik 14:00etara.
Bestalde, Marierrota mareen errota irekita egongo dela jakitera eman du Lekeitioko Udalak. Apirilaren 1etik 4ra, 10:00etatik 14:00etara bitartean zabalik egongo da, eta bisitak doan izango dira. Alde batetik, eraikin horretan garatutako jarduerarekin lotutako gaiak ezagutzeko aukera edukiko dute bisitariek, hala nola funtzionamendua, ehotzea eta garaiko ohiturak, eta bestetik, Lea Ibilbidearen inguruko azalpenak ematen dituen interpretazio zentro txiki bat ere aurkituko dute bertan, Lea Ibarrako padurak eskaintzen duen biodibertsitateaz gehiago jakiteko: martin arrantzalea, lertxuna, bisoia… eta hainbat landare mota desberdin.. Bertatik abiatzen da bai eta ere, ardoaren eta arrainaren ibilbidea edo GR38 bezala ezagutzen dena; Lekeitiotik Oionera doan ibilbidea hain zuzen.
Itsasargiak ere bisitak jasoko ditu Aste Santuan. Bertan, itsas nabigazioaren oinarriak ezagutu eta itsasontzi batean bidaia birtuala egin ahalko dute bisitariek. Informazio guztia Lekeitioko Turismo orrialdean dago eskura.
