Quincoces eta Riba bigarren sailkatu dira Bikotekako Espainiako Txapelketan
Hasieran txapeldunekin lehia polita eduki zutela azaldu du mendi eskiatzaile mendexarrak.
Quincoces, ezkerrean, eta Riba. Argazkia: Euskal Mendizale Federazioa. Bikotekako Espainiako Txapelketa lehiatu zuten atzo [martxoak 21] Candanchun (Huesca, Aragoi), eta Nahia Quincoces mendexarra Marta Riba katalana txapeldunorde geratu ziren; bi ordu, 26 minutu eta 48 segundotan amaitu zuten proba.
2 ordu 21 minutu eta 23 denboragaz, Ana Alonso eta Julia Casanovak irabazi zuten txapelketa, eta Uxue Frailek eta Claudia Valerok (2:44:26) osatu zuten podiuma.
Hasieran txapeldunekin lehia polita eduki zutela azaldu du Quincocesek: “Hasieran lehenengoengandik nahikoa hurbil joan ginen. Baina, lasterketan aurrera joan ahala, batez ere jaitsieretan distantzia atera ziguten. Azkenean ezin izan genuen eurekin heldu, baina bigarren postuagaz ere oso pozik gaude”.
Eguraldiak baldintzatuta, ibilbidea aldatu beharra eduki zuten. Izan ere, goian lainoa sartu zen eta haize indartsua: “Ibilbide oso polita prestatuta zeukaten. Baina, pistetatik egin behar izan genuen lasterketa. Aurten Candanchu ez dutenez zabaldu, elur guztia zapaldu barik zegoen, elur egin berria zen, eta lasterketa oso polita irten zen”.
Argazkia: Nahia Quincoces/Instagram
Bestalde, gizonezkoen senior kategorian Antonio Alcalde eta Noel Burgos izan ziren onenak (1:48.55). Jordi Alis eta Nil Cardona bigarren sailkatu ziren (1:51.56), eta Iñigo Martinez de Albornoz eta Axier Alonso euskaldunak hirugarren (1:58.45).
Azkena apirilean. Mendexako mendi eskiatzaileak Adamello Ski Raid proba lehiatuta amaitu gura du aurtengo denboraldia. Ana Alonsogaz izena eman du, eta apirilaren 10ean lehiatuko dute: “Ez da Munduko Kopakoa, baina mundu mailako zirkuitu batekoa da, lasterketa luzeak egiten diren zirkuitukoa. Berez zirkuitu luzea da, baina aurten lasterketa gehienak bertan behera utzi dituzte. Momentuz hau bakarrik mantentzen da, eta esaten dute egin egingo dutela”.
