Kanpaina bat abiarazi dute Debabarrenan, edukiontzi horian hondakin desegokiak agertzen direlako
Debabarrena Mankomunitateak edukiontzi horira ze motatako hondakinak bota daitezkeen argi uzteko kanpaina abiarazi du. Eskualdeko etxebizitza guztietara eskuorri bat banatu dute.
Iosu Arraiz Debabarrena Mankomunitateko lehendakaria. Argazkia: Debabarrena Mankomunitatea Horian zer? izena daraman kanpaina martxoaren 28ra bitartean landuko dute. “Azaroan egindako azterketa batek erakutsi zuen edukiontzi horian hainbat hondakin desegoki agertzen direla gure eskualdean. Horrek birziklatze prozesuan eragiten dituen arazoak aztertu ondoren, erabaki dugu herritarrengana jotzea”, azaldu du Iosu Arraiz Debabarrena Mankomunitateko lehendakariak.
Egitasmoa “hezitzailea” dela eta Ecoembesekin batera garatu dutela esan dute. “Gidaliburu bat banatu dugu etxebizitza guztietara. Horretan jaso dugu edukontzi horian zein motatako hondakinak utzi daitezkeen eta zeintzuk ez”.
Gidaliburuak irudien bidez azaltzen du zer nora bota behar den. “Erraz ulertzeko moduan azaltzen dira horira bota daitezkeen ontzi arinak eta bota ezin daitezkeen gainerako plastikoak. Esaterako, ontziak ez diren plastikozko eta metalezko objektuak ezin dira edukiontzi horian utzi”.
Gaikako bilketa hobetzeko herritar guztien inplikazioa “ezinbestekoa” dela dio Arraizek. “Guztiok ulertu behar dugu edukiontzi bakoitzean zein hondakin utzi daitezkeen eta zeintzuk ez, gure ohiturak zuzentzeko eta gure eraginaz kontziente izateko”.
