Udaberriari ongietorria emateko musika bideoak, Tarineren eskutik
Astelehenean hasita, eguenera arte egunero bideo bat argitaratuko du Tarinek. Sare sozialetan eta webgunean egongo dira bideoak ikusgai.
Berriatua eta Markina-Xemeingo Tarine udal musika eskola udaberriari ongietorria emateko bideoak ari da eskaintzen egunotan, sare sozialen bidez. Astelehenean [martxoak 22] eskaini zuten lehendabiziko bideoa, eta eguenera bitartean [martxoak 25] beste hiru bideo eskainiko dituzte. Eta gerora ere bideo horiek ikusteko aukera egongo da, sare sozialetan mantenduko bai dituzte.
Alde batetik Ixura taldeak Stevie Wonderren abesti bat eskaini zuen asteleheneko bideoan.
Gaur [martxoak 23], ostera, musika tailerreko ikasleek Queen taldearen abesti bat eskaini dute. Eguaztenean [martxoak 24] Trikipand taldeko kideak izango dira protagonista, eta horretan Mikel Urdangarinen abesti bat eskainiko dute. Azkenik, eguenean [martxoak 25] Hizkuntza Musikaleko ikasleen txanda izango da. Azken bideo horretan, gainera, beste instrumentu batzuk lagunduta parte hartuko dute. Hala, Hizkuntza Musikaleko ikasleak pianoa, bibolina edo gitarra jotzen duten musikariek lagunduta agertuko dira, eta Izaroren abesti bat eskainiko dute.
Bideo horiek guztiak Tarineren Facebook orrialdean, Instagramen edota webgunean daude eta egongo dira ikusgai.
