Lekeitioko Udalak bertan behera utzi du Aste Santurako prest zeukan turismo kanpaina
Pandemiaren joerak okerrera egin duela eta, herritarren osasuna lehenestea erabaki dute.
Momentu honetan Lekeition birusaren intzidentzia tasa baxua bada ere, erkidego mailan pandemiaren joerak okerrera egin du azken egunetan, eta beste herrialde batzuetan ere kutsatuen kopuruak zeharo egin du gora. Eboluzio hori kontuan hartuta, neurriak hartzea erabaki du Lekeitioko Udalak.
Horrela, Aste Santura begira, bisitariak Lekeitiora erakartzeko eta herriko merkataritza eta ostalaritzari bultzada emateko prest zeukaten turismo kanpaina bertan behera uztea erabaki dute. “Bisitariek Lekeitiora etortzeko aukera izango badute ere, ez da inolako deialdirik egingo udalaren aldetik”, azaldu dute.
Oinarrizko zerbitzu turistikoen informazioa eta ordutegiak emango dituzte bakarrik, hau da, Marierrota, Santa Katalina itsasargia edota turismo bulegoaren berri, eta informazio gehiagorako Lekeitioko Turismo orrialdea erabilgarri dagoela ekarri dute gogora. “Erabaki hau Lekeitio eta lekeitiarren osasun ona bermatzeko helburuarekin hartu da. Argi dago jende pilaketak egoteak arriskua areagotzen duela, eta, ondorioz, ez da egingo inolako deialdirik bisitariak erakartzeko. Gogoratu behar da Aste Santuko prozesioak ere bertan behera geratu direla. Une honetan lehentasuna gure osasuna babestea da”, azpimarratu dute.
Egoera epidemiologikoak hobera eginez gero, udara begira turismo kanpaina bat landuko dutela iragarri du udalak, baina, aurretik, herriko turismo sektorearekin batera aztertuko dute egoera.
