Lekeitiora ere ailegatuko da Kutxa Bira
Maiatzaren 4an egingo diote harrera lekeitiarrek, 'Bizi gira...Kutxa Bira' egitasmoko kutxari. Bideo bat prestatuko dute ekimenerako, eta Aittitta Txiki kultur taldeak parte hartzera gonbidatu ditu herriko taldeak.
Aittitta Txiki kultur elkarteko kideak. Argazkia: Aittitta Txiki kultur elkartea Martxoaren 20an Viedmatik (Argentina) abiatu zen Bizi gira…Kutxa Bira egitasmoko kutxak geldialdia egingo du Lekeition ere. Maiatzaren 4an ailegatuko da, hain zuzen ere, Gautegiz-Arteagatik Lekeitiora. Eta zelan ez, harrera egingo diote Abaroa parkean. Kutxa barruan bidaiatzen ari den Amets Arzallusen idatzia irakurri eta lekeitiarren amets edo aldarria sartuko dute kutxan, eta bideo bat ere prestatuko dute ekimenerako.
Pandemiaren ondorioz, euskaragaz lotutako hainbat ekimen bertan behera geratu behar izan dira, eta egoera berezi honetan ere, euskarari bultzada bat eman nahi izan dio Iparra Hegoa elkarteak euskal diaspora eta Euskal Herria batuko dituen Bizi gira…Kutxa Bira ekimena abiaraziz. Euskalgintzako eta herrigintzako eragileen ametsak biltzea du helburu ekimenak. Horretarako diasporatik abiatu eta Euskal Herri guztia zeharkatuko du Kutxa Birak.
Herriz herri bidaian jarri dute egurrezko kutxa bat aldarrikapenez beteko dute. Horrez gain, Amets Arzallus bertsolariak idatzitako mezua gordetzen du kutxak. Euskal diasporak apirilaren 8ra arte edukiko du bere ametsak kutxan gordetzeko aukera, apirilaren 8an helduko da kutxa Baionara, eta Euskal Herrian zehar jarraituko du bidaia. Maiatzaren 30ean amaituko du ibilbidea Seguran.
Hainbat urtetako hartu-emana dauka Lekeitioko Aittitta Txiki kultur taldeak Iparra Hegoa elkarteagaz, eta beraz, ekimenagaz bat egingo duen 71 herrietako bat izango da Lekeitio. Egun horri begirako egitaraua osatzen ari dira orain, eta bideo bat ere prestatuko dute. Bideo horretarako, baina, herriko talde eta elkarteen parte hartzea bilatu nahi izan du Aittitta Txikik, eta 10-15 segundoko bideo bat egitera gonbidatu dituzte herriko talde eta elkarteetako kideak.
Jose Miguel Meabe Aittitta Txiki elkarteko kideak azaldu duenez, Zein da Lekeition euskarari desio diozun etorkizuna? galderari erantzunez egin behar dute bideoa, eta gero Jon Granderen helbide elektronikora bialdu (jonnahiapaste@gmail.com). “WhatsAppetik barik bideoa posta elektronikoz bidaltzea hobetsi dugu, kalitate hobea izateko”, zehaztu du.
Oraingoz 21 taldek esan diote baietz bideoan parte hartzeko gonbidapenari: Amandarri Triatloi Taldeak, Galarrena kultur elkarteak, Etorkizuna Dantza taldeak, Etorkizuna Dantza Taldeak, Potxuak Martxanek, Atabakak, Zaletxuak, Bihotz Zabalek, Lekittoko Deabruak, Isuntza arraun taldeak Lekitto Musika bandak, Garraitz kirol taldeak, Aratuste Alai estudiantinak, Aittitta Makurra Txarangak, Musikaia Musika Eskolak, Lekitxo bedarrak, Lekeitioko Eskolak, Azkue Ikastolak, Gaztetxeak, Aek-k, Kitto merkatari elkarteak eta Aittitta Txiki elkartekoak ere parte hartuko dute.
Bideoa horizontalean grabatu behar dela gaineratu du Aittitta Txikiko kideak, eta bideoa bidaltzeko azken eguna martxoaren 31 izango dela azpimarratu du.
Maiatzaren 30ean Segurara joatea ere aurreikusten dute Aittitta Txikikoek. “Herriko taldeetako kideak animatuz gero, autobusa jarriko genuke bertara joateko”. Jakitera eman dutenez, Lekeitioko Udalak ere bat egin du egitasmoagaz.
