Aurten ere irailean ospatuko dute Artedrama, pandemiaren ondorioz
Egoera nola dagoen ikusita, ez dute posible ikusi antzerki topaketak "behar eta nahi bezala" Pazko Astean egitea. Irailaren 20tik 25era egitea aurreikusi dute.
Ohiko egutegiari eutsi nahi izan diote, baina 2020an modura, aurten ere irailean egingo dute Artedrama antzerki topaketak Aulestin. Printzipioz, irailaren 20tik 25era egitea aurreikusi dute: “Erabakia hartzeko azken momentura arte itxaron dugu, zalantza asko genituelako. Pazko Astean egin nahi genuen, baina ikusten genuen egoera ez zela onena. Ezinezkoa iruditzen zitzaigun momentu honetan indarrean dagoen araudiarekin gurea bezalako proposamen bat gustatuko litzaigukeen moduan antolatzea, eta ahal den neurrian, ez diogu uko egin nahi Aulestiko topaketen poz eta ilusio horri”, azaldu du Ander Lipus Artedramako kideak.
Esan du baldintza asko zituztela kontra: “Ikasleen tailerreetan neurri asko hartu behar dira, eta horretaz aparte, badago herrian sortzen dugun dinamika. Jaialdia ez da bakarrik antzerkia; badauka bere puntu soziala. Adibidez, emanaldi ostean elkarrekin taberna batean ezin elkartzea penagaz hartuko genuen. Eta ordutegiak ere asko aurreratu behar ziren. Asmoa zen dena frontoian egitea. Argiztapen aldetik azpiegiturak jartzen dira besteetan, iluntzean edo gauean zirelako. Arratsaldeko zazpiretan egun argia da, eta horrek ere baldintzatzen zuen antzezlanak ematerako orduan”.
Beste data batzuk ere aztertu zituzten, udan egitea adibidez, baina pentsatu zuten “datarik egokiena” iraila zela
Lipusek esan duenez, erabakia “aho batez” hartu dute. Udal arduradunekin eta emanaldietako ordezkariekin berba egin dute: “Guk bakarrik ez dugu dena baloratu. Antolatzaileak geu gara, baina Aulestiko herriak bazeukan zer esan, eta hala izan da. Udalari esan genion zein zen gure ezinegona, eta nola ikusten genuen”. Beste data batzuk ere aztertu zituzten, udan egitea adibidez, baina pentsatu zuten “datarik egokiena” iraila zela. “Nahiago izan dugu irailera pasatzea, ekainera edo pasatzea ordez. Uste dugu ekainean ez direla gauzak askorik aldatuko, eta espero dugu uda ostean, irailean gauzak hobeto egotea. Hori espero dugu, eta bestela, aurre egingo diogu datorrenari”.
ADEL topaketaren egitaraua prest zeukaten, eta tailerretako irakasleak ere lotuta: “Programa eta antzezpenak prest genituen, eta irakasleekin ere berba eginda geunden. Behintzat gauzarik pozgarriena da dena ahal den heinean mantendu egingo dugula. Lan asko aurreratu dugu, baina hitza ez genion inori eman. Antzerki talde guztiok dakigu zein den gure egoera. Badakigu zein den errealitatea. Espero dugu irailerako egoera pixka bat hobea izatea”. Ikasleentzat matrikula egiteko epea ez zuten zabaldu, baina, halere, eskariak eduki zituzten: “Izen-ematea zabaldu gabe ere, pila bat jende gogotsu zegoen, eta izena emanda moduan; matrikulazio epea zabaltzen zenerako izena emateko itxaroten zeuden”.
Gogotsu eta baikor prestaketekin jarraituko dutela azpimarratu dute.
