700 aparkaleku baino gehiago, Lekeitioko bizilagunentzat
Aurtengo udan ere, herritarrentzako prestatutako aparkaleku zerbitzua jarriko du martxan Lekeitioko Udalak.
Urtero modura, udaldian Lekeitiotik kanpo lan egiten duten herritarrek herrira bueltatzean euren autoa aparkatzeko aukera gehiago izango dituzte, azken urteetan modura, aurtengo udan ere, herritarrentzako prestatutako aparkaleku zerbitzua martxan jarriko du-eta Lekeitioko Udalak.
Iaz baino epe luzeagoan egongo da zerbitzua martxan gainera, ekainaren 1etik irailaren 30era bitartean. Epealdi horretan, astelehenetik barikura eta 14:30etik 21:00ra bitartean, baimenduek bakarrik utzi ahalko dute autoa zehaztutako guneetan.
Sei izango dira aurten Lekeitioko Udalak aparkaleku zerbitzu berezia eskaintzeko egokituko dituen guneak. Iazko guneak mantenduko dituztela jakitera eman du udalak, baina leku gehiago gordeko dituzte euretan. “Aldamiz Etxebarria kalean 27 aparkaleku gehiago egongo dira eta San Bixente Ferrer-en 12 gehiago”, zehaztu dute. Udalerri osoan guztira, 700 aparkaleku baino gehiago edukiko dituzte eskura herritarrek.
Hauek izango dira guneak:
- Paskual Abaroa etorbidea 26-bisetik Talara, eta San Juan Talako.
- San Andres, Eusebio Maria de Azkue, Piedade, San Bixente Ferrer, Antuguako Ama eta Basoaldea.
- Zumatzeta, Buenaventura Zapirain, Otxoa de Urkiza eta Agirre Solarte 1etik 17ra.
- Aldamiz Etxebarria 1, 3, 5, 22, 24 eta 26 eta Letraukua 8 eta 9.
- San Antolin, Aldaztorre eta Carlos Solano kaleak osorik.
- Txatxo Kaia kalean plaza eta portuaren arteko gunea.
Baldintzak. Lehentasun hori edukitzeko baina, baldintza batzuk bete beharko dira, eta aparkatzea baimentzen duen itsasgarria eskatu behar da. Iazko erabiltzaileek zein berriek apirilaren 13tik maiatzaren 14ra bitartean egin beharko dute eskaera herriko turismo bulegoan. Baimenak 3 euroko kostua edukiko duela azaldu du udalak, 2020an itsasgarri berria egin zutenentzat ezik; horiek doan eskatu ahalko dute berria. Baldintza guztiak betetzen dituztenek 2021-2022 urteetarako itsasgarria edukiko dute.
