Ondarroa, itxita gutxienez apirilaren 7ra arte
Jaurlaritzak zapatuan [martxoak 27] eguneratu zituen herrietako tasak, eta Ondarroak 700,36ko tasa dauka. Hurrengo eguneraketa apirilaren 6an egingo dute, eta hurrengo egunetik aurrera hartuko dira kontuan. Beraz, gutxienez datorren asteko eguaztenera arte egongo da Ondarroa itxita.
Labi aholku batzordeak barikuan [martxoak 26] esan zuen gaurtik aurrera [martxoak 29] 400dik gorako tasa duten udalerriak perimetralki itxita geratuko zirela. Bada, Jaurlaritzak zapatuan [martxoak 27] eguneratu zituen herrietako intzidentzia tasak, eta orduan 583,63ko tasa zeukan. Gaur [martxoak 29], baina, 700,36ko tasa dauka.
[Ikus LEA-ARTIBAI ETA MUTRIKUKO EGOERA EPIDEMILOGIKOA]
Iñigo Urkullu lehendakariak esan zuen herrietako intzidentzia tasak astelehenetan eguneratuko dituztela, baina hurrengo astelehena jai eguna denez, datorren astean martitzenean [apirilak 6] eguneratuko dituzte tasak. Eta tasa eguneratu eta neurriak hurrengo egunean ezartzen direnez, Ondarroa perimetralki itxita geratuko da gutxienez apirilaren 7ra arte.
Ondokoak dira 400dik gorako tasa daukaten gainerako herriak:
- 5.000 biztanle baino gehiago dituztenak: Beasain (841,59), Elorrio (725,03), Ermua (749,11), Lazkao (1.047,59), Muskiz (427,86), Ordizia (953,33) eta Urretxu (453,95).
- 5.000 biztanle baino gutxiago dituztenak: Ataun (1.659,99), Berriz (493,35), Elciego (2.318,84), Bilar (1.420,45), Idiazabal (420,17), Iruña-Oka (1.002,79), Olaberria (1.090,51), Urkabustaiz (620,69), Zaldibia (1.869,72), Zegama (1.775,15) eta Zigoitia (585,82).
Azalpena. Aipatu behar da 5.000 biztanle baino gutxiago duten herriei dagokienez, perimetralki itxita geratzen dira baldin eta hiru baldintza betetzen badituzte: 400dik gorako tasa edukitzea, herriari dagokion osasun eremuaren intzindentzia tasa 400dik gorakoa izatea eta azken zazpi egunetan 4 kasu positibo baino gehiago edukitzea.
[Ikus LEA-ARTIBAI ETA MUTRIKUKO EGOERA EPIDEMILOGIKOA]
Birusaren intzidentzia 400 kasutik gorakoa den udalerrietan, gainera, espazio itxietan egiten diren kirol jarduerak gehienez lauko taldeetan egitea adostu dute, Labiren batzorde teknikoak hala aholkatuta, eta betiere talde profesionalen eta federatuen entrenamendu eta lehiaketak salbuetsita. Herri horietan, kirol instalazioetako aldagelak eta dutxak itxita egongo lirateke, igerilekuetakoak izan ezik; horietan, gehieneko edukieraren %35eko okupazioa duten aldagelak erabili ahal izango dira, eta baita dutxak ere, baina banaka. Azkenik, joko eta apustu etxeetan ostalaritza eta jatetxe zerbitzuak eskaintzea debekatzea adostu dute. Gaur [martxoak 26] adostutako neurriak “gutxienez” hogei egunez egongo dira indarrean.
