Aurrerak garaipenagaz hasi du bigarren fasea
Ondarroako taldeak 1-0 irabazi dio Ariznabarrari. Fase honetan hamar jardunaldi lehiatuko dituzte eta partidu bakoitza "final bat dela" eta talde denak "aurkari zuzenak" direla adierazi du Iñaki Garcia Aurreraren entrenatzaileak.
Argazkia: Leartigol Hurrengo denboraldian Hirugarren Mailan segitzeko helburua lortzeko Aurrerak partidu garrantzitsuak jokatuko ditu datozen asteotan. Ligaren bigarren fasea asteburuan hasi dute. Ondarroako taldeak 1-0 irabazi zion Ariznabarrari, atzo [apirilak 11].
72. minutuan Eñautek egin zuen partiduko gol bakarra. Neurketa “trabaz betetakoa” izan zela adierazi du Iñaki Garcia Aurreraren entrenatzaileak: “Asko kostatu zitzaigun partidua aurrera ateratzea, eta uste dut joko aldetik, bidezkoena berdinketa izango zela. Gure jokoan baino eurenean gehiago egon ginen. Ariznabarrak ondo kontrolatu gintuen, eta presio hori gainditzea ez genuen lortu”.
Irakurketa hain baikorra ez bada ere, fase honetan ere puntuak pilatzea da garrantzitsuena, eta beraz, atzoko garaipenak esperantza izaten jarraitzeko bultzadatxoa eman die. “Ondo jokatuz gero, irabazteko aukera gehiago izaten dituzu. Beti ezin duzu nahi moduan jokatu, eta oso garrantzitsua da ondo jokatzen ez duzunean ere puntuak lortzea. Egoera honetan zenbakiek balio dute, eta helburua puntuak dira”.
Fase honetan hamar jardunaldi lehiatuko dituzte ekainaren bigarren asteburura bitartean. “Partidu bakoitza final bat da, denok gara aurkari zuzenak”, zehaztu du Aurreraren entrenatzaileak. Hamar talde ari dira mailari eusteko borrokan, eta horietatik sei talde mailaz jaitsiko dira.
Gaur gaurkoz CD Santurtzi, Tolosa CF, Aurrera KE eta SCD Durango daude salbazio postuetan, eta jaitsiera postuetan daude Balmaseda FC, Sodupe UC, JD Somorrostro, Lagun Onak FT, CD Ariznabarra eta Urgatzi KK.
Emaitzen arabera, “astez aste sentsazioak aldatuko” direla uste du Garciak.
Asteburu honetan etxetik kanpo ariko da talde ondarrutarra. Soduperen kontra jokatuko du domekan [apirilak 18].
Taldea ondo ikusten du entrenatzaileak, eta garaipenen garrantzia nabarmendu du: “Azkenaldian zenbakiak alde ditugu, eta taldeak hori behar zuen. Ondo lan egiten arituta, zenbakiak lagun ez baditu entrenatzea eta sinistea oso zaila da, zalantza gehiago egoten dira. Momentu honetan emaitzak laguntzen gaituzte, eta taldea ondo dago. Baina dinamikak berehala aldatzen dira, eta ez dago astirik aldatzeko”.
