Azken langile bien heriotza salatzera atera dira Lekeition
Prekarietateaz amaitu eta duintasunez bizitzeko aldarrikapena egin dute.
Joan den barikuan Eskolapean egindako elkarretaratzea. Argazkia: Karpanta Abadiñon eta Trapagaranen gertatutako langileen heriotzak salatzeko elkarretaratzea egin zuten bariku [apirilak 9] iluntzean Lekeitioko Eskolapean. Jatetxe bateko kargagailua gainera erori zitzaion 57 urteko emakumea hil zen apirilaren 8an Zugaztietan eta enpresa batean garabi batekin ari zela zamak azpian harrapatu zuen gizonezkoa apirilaren 9an Abadiñon.
Gogora ekarri zutenez, Euskal Herrian hamasei langile hil dira jada aurten, eta Zaldibarreko zabortegian oraindik zabor azpian jarraitzen du batek. Horren guztiaren erantzulea prekarietatea dela azpimarratu zuten: “Erailketok bi erantzule dituzte: patronala, lan baldintza prekarioengatik eta Administrazio publikoa prekarietatea legeztatu eta normalizatzeagatik”.
Herriko sektore desberdinetatik egin zen deialdia –emakume, pentsionista, gazte, udal langile, emakume etorkin…–, eta erantzuna ere zabala izan zen. Prekarietateaz amaitu eta duintasunez bizitzeko aldarrikapena egin zuten.
