I. Señora bertso sariketa Mutrikura ailegatuko da
Bi kanporaketa saio jokatuko dira: Aramaion bat eta Mutrikun bestea. Finala Lesakan jokatuko da. Umorea ardatz hartuta, señora izaerari aldarri egingo zaiola argitu dute antolatzaileek.
I. Señora bertso sariketaren helburua da emakume bertsolariek elkarrekin kantatzeko aukera edukiko duten guneak sortzea eta horiek plazan duten presentzia gehitzea. Sariketan hamalau emakume bertsolarik parte hartuko dute, eta bi kanporaketa saio eta finala egingo dira. Hain zuzen, Mutrikun bigarren kanporaketa jokatuko da, apirilaren 24an. Saio guztiak 17:00etan hasiko dira, eta sarrerak saioa jokatuko den herrian bertan edo Internetez erosi daitezke; sarrerak 5 euro balio ditu.
Lehenengo kanporaketa saioa apirilaren 17an jokatuko da, Aramaioko kultur etxean. Horretan, ondoko bertsolariak ariko dira: Haizea Arana, Oihane Perea, Itxaso Piquer, Maddi Aiestaran, Miren Artetxe eta Alazne Untxalo. Gai jartzailea Ainhoa Urien izango da.
Bigarren kanporaketa Mutrikuko Galbaixoko ermitan jokatuko da, eta ondoko bertsolariak ariko dira: Oihana Bartra, Saioa Alkaiza, Ainhoa Agirreazaldegi, Oihana Arana, Paula Amilburu eta Aissa Intxausti lekeitiarra. Gai jartzailea Maite Berriozabal izango da.
Umorea tresna nagusi gisa erabiliz, señora izaerari aldarri egingo zaiola azaldu dute. Ekimenarekin “belaunaldien arteko sareak indartu eta emakume bertsolarien ahalduntzean pauso bat gehiago ematea” da asmoa
Finala maiatzaren 8an jokatuko da, Lesakako Arrano tabernako terrazan. “Aramaioko eta Mutrikuko saioetatik bina bertsolari sailkatuko dira finalera, eta bertan kantuan ariko diren beste bi bertsolariak zuzenean finalerako daude sailkatuta señora izateagatik, baina nortzuk diren ez dugu jakingo eguna iristen den arte”.
Ekimena emakume bertsolari batzuek eta bertsozale feministek antolatu dutela esan dute, tokian tokiko herri eragile ta mugimendu feministetako kideekin elkarlanean. “Umorea tresna nagusi gisa erabiliz, señora izaerari aldarri egingo zaio. Kontzeptu lausoa baita señora izatea, zehazten zaila, baina, aldi berean, guztiok ulertzeko gai garena”. Gaineratu dute kontzeptua andre zaharrarekin, bakardadearekin edo ausardiarekin lotzen dela. “Maiz gutxietsia edo epaitua, baina desiratua ere bai batzuetan”. Horren guztiaren aurrean, eta aldarri hori eginez, “belaunaldien arteko sareak indartu eta emakume bertsolarien ahalduntzean pauso bat gehiago ematea” da asmoa.
